الخميس، 29 مايو 2008

^_^ بــقـــالــتــي ^_^

السلام عليكم و رحمة الله و بركاته

شلونكم يا الطيبين شخباركم ؟

اليوم نويت في هالبوست المتواضع افتح بقالة قلب طفله
لكل ما لذ و طاب من مشتريات الطفوله :
كاكاوات و بطاطات و عصيرات و علوووج و بردات و العاب


بقولكم سالفتي مع الجمعيات او الفروع و البقالات

من صغري كنت كل ما اطلع من الروضه و بعدها

المدرسه بجميع مراحلها شي ضروري ابوي او امي

يمرون فيني الجمعيه اذا كلش الفرع

و اذا كلش كلش البقاله المهم ارد البيت معاي جيس مليان

خربطه على قولت الكبار ^_*
هذا بايام الدوامات انزين بالويك اند شلون اروح ؟!
سلمكم الله اذا اجتمعوا الاهل و بزوارتنا كلنا يا الصغار

نلعب و نستانس و قبل المغرب نطلع قروب بنات و صبيان

مع الخدم للفرع اللي يم البيت .
اسم الله علينا طابور و ضابطة هالطابور طباختنا العجوز

الله يذكرها بالخير كانت تخوفنا و تمشينا عدل لوووووول
تالي يوم كبرنا شوي نروح بالسياره ..
يا حلاتها من اياااام المهم طول الطريج ضحك و غشمره

و ندخل الفرع ننتشر كل واحد يملي سلته باللي يبيه

و نوقف دور ع الكاشير نحاسب و اللي يخلص يصفط برا

ينطر الباجي و نرد للبيت بنفس الطريقه اللي رحنا فيها .
انزين بقولكم شي بسيط من اللي يكون بسلتي :


(( عصير سانكست او كورتينا / بفك سفينه /

علج بوقطوه و بوسهم / برد صاروخ و فيلجا و طياره

/ حلاو مصاص قلب الحب الاحمر / سنيكرز / اروا/

كيك امريكانا سويس رول كاكاو و ممكن يكون فراوله ))


و اول ما ندش سيييده نتوجه بامر من امهاتنا لغرفة

الطعام ناكل و نعفس الدنيا فيها و نسولف بما يعنينا ..
و اللي يعنينا بذاك الوقت كل واحد او وحده يقص قصصه

بالمدرسه و شنو صار و انت ما شريت هالكاكاو و انا

شريت هالبطاط و لا انا شريت هاللعبه و تالي نتفق

منو يلعب مع منو و شنو اللعبه .

نخلص البنيات اسم الله علينا مرتبين نشيل قشنا

اللي قطيناه بس الصبيان الله من الذرابه عندهم

يمشون و الحوسه وراهم نسمع تحلطم الخدامات

و نروح نفتن عليهم لووول

عاد يبتدي اللعب بالدوارف و الحوش و اهم شي

رحنا الفرع او البقاله ^_^

و للحين اذا وديت خواتي الصغار اشتري اللي متعوده

عليه من صغري ينطبق علي مقولة :

من شب على شيئا شاب عليه ..

عقب هالقرقه و الهذره ويا ذكرياتي البقاليه او الفرعيه

(( مو فرعية انتخابات ؟ لالالالا كلمة فرعية مشتقه من

فرع الجمعيه لا يروح بالكم لذاك الصوب *_* ))

ابي اعرف شنو الخرابيط اللي كنتوا تشترونها

من البقاله و انتوا صغار ؟؟

و للحين نفس الشغلات تشترونها و لا خلاص

كبرنا على هالسوالف ؟؟

السبت، 24 مايو 2008

$ كـ ن ــز الــ ص ـــداقــهـ $



مع مرور الايام و الاعوام و ازدحام ذاكرتنا بالمحيطين بنا

من كل شكلا و لون ، طولا و عرض ، خلقا و خلقه ،

اقوال و افعال ، حب و كره ، حقيقه و سراب .


مع كل لحظه تمر بنا لابد لنا من وقفه للنظر في صندوق مدخراتنا ..

صندوق يحمل بداخله كل غالي و نفيس كل ما نجمعه للقادم من السنين

كل ما نتكىء عليه في وجه المجهول من : ذكريات ، نواتج الخبرات ،

احباب و اصحاب هم طوق النجاة عندما تبتلعنا امواج الضياع ..

احباب و اصحاب كنز لا يقدر بثمن و لا يفنى ، كنز و ان شحت

جميع الكنوز ايديهم لن تشح بكلمه ، بنصيحة ، بفكره ، بمواجهه ،

بحب بلا غايات حب لذواتنا حب لا يهدم بل يبني ...

الصديق انعكاس ذاتك ، مراتك دون تجميل و تزييف .

الصديق يمشي اليك عندما يبتعد العالم اجمع عنك .

الصديق يتعلم منك و تتعلم منه و ان اختلفتم حتما ستتفقون .

الصديق من يعرف اغنية قلبك و يستطيع ان يغنيها لك عندما تنسى كلماتها .

الصداقه نعمه يهبها الله لمن يحب و يستطيع ان يقدرها لكي لا تزول .

قال لي والدي الغالي ذات يوم عندما اعتزلت صديقاتي و انا

صغيره لسبب تافه طفولي ..

بنظري حينها انه نهاية العالم :)


** عندما ترحلين و تتركين خلفك احبابا و اصدقاء يذكرونك بالخير
و المحبه فقد عشتي اجمل حياة و نحتي بالقلوب عهد الاصدقاء .
و ثقي بأن السعاده بالكنز المدخر بالقلوب قبل البنوك **


في ذلك الوقت حفظتها دون فهم و كررها على حينما يلزم الامر الى

ان فهمتها و طبعت بقلبي قبل عقلي ..


احبك ابي ...


احبك لانك ابي و صديقي و مرشدي و نور دربي حفظك الله لنا .



مع ان الصداقه بكل ثانية من كل دقيقه نعيشها خصص لها يوم


سمي باسمها من كل عام (( يوم الصداقه : 25 / 5 / ---- )) اقول :


لكل من اخلص للصديق و احبه و لكل من عرف معنى الصداقه

الحقيقيه و حافظ عليها بقلبه و عقله ..


كل عام و الصداقه تزيد متانه و كل عام و القلوب بالحب عمرانه ..

شكرا لله على وجودكم في حياتنا ..


الأربعاء، 14 مايو 2008

الى جنة الخلد بابا سعد



13 / 5 / 2008


--(( يا أيتها النفس المطمئنة ارجعي إلى ربك راضية
مرضية فادخلي في عبادي وادخلي جنتي ))--


اللهم ابدله دارا خيرا من داره واهلا خيرا من اهله وادخله الجنة
واعذه من عذاب القبر ومن عذاب النار .

اللـهـم عاملة بما انت اهله ولا تعامله بما هو اهله .ا

للـهـم اجزه عن الاحسان إحسانا وعن الأساءة عفواً وغفراناً.

اللـهـم إن كان محسناً فزد من حسناته , وإن كان مسيئاً فتجاوز عن سيئاته .

اللـهـم ادخله الجنة من غير مناقشة حساب ولا سابقة عذاب .

اللـهـم اّنسه في وحدته وفي وحشته وفي غربته.

اللـهـم انزله منزلاً مباركا وانت خير المنزلين .

اللـهـم انزله منازل الصديقين والشهداء والصالحين وحسن اولئك رفيقا .

اللـهـم اجعل قبره روضة من رياض الجنة ,ولا تجعله حفرة من حفر النار .

اللـهـم افسح له في قبره مد بصره وافرش قبره من فراش الجنة .

اللـهـم اعذه من عذاب القبر ,وجاف ِالارض عن جنبيها .

اللـهـم املأ قبره بالرضا والنور والفسحة والسرور.

اللـهـم إنه فى ذمتك وحبل جوارك فقه فتنة القبر وعذاب النار ,
وانت أهل الوفاء والحق فاغفر له وارحمه انك انت الغفور الرحيم.

اللـهـم انه عبدك وابن عبدك خرج من الدنيا وسعته ومحبوبيه وأحبائه
إلي ظلمة القبر وماهو لاقته .

اللـهـم انه كان يشهد أنك لا إله الا انت وأن محمداً عبدك ورسولك وانت اعلم به.

اللهم ثبته عند السؤال .

اللهم انا نتوسل بك اليك ونقسم بك عليك ان ترحمه ولا تعذبه .

اللـهـم انه نَزَل بك وأنت خير منزول به واصبح فقير الي
رحمتك وأنت غني عن عذابه .

اللـهـم انقله من مواطن الدود وضيق اللحود إلي جنات الخلود .

اللـهـم إحمه تحت الارض واستره يوم العرض ولا تخزه
يوم يبعثون "يوم لا ينفع مال ولا بنون إالا من أتي الله بقلب سليم"

اللـهـم يمن كتابه ويسر حسابه وثقل بالحسنات ميزانه وثبت علي الصراط
اقدامه واسكنه في اعلي الجنات بجوار حبيبك ومصطفاك (صلي الله عليه وسلم)

الـــلـــــهــــــــــم آمــــــــــــيــــــــــــــن


الاثنين، 12 مايو 2008

نافق تعيش ...



صباح الفل ان كان صباحا // مساء الجوري ان كان مساءا

كالعاده قاعده بالصالة و محتضنه اللاب توب اقرى هالمدونه

و اطل على هالجريده او احوس في احد المنتديات و الاخبار
من سيء لاسوء حول العالم الله يعين البشر بس :(

و الا صوت موبايلي تويت تويت تويت تويت .. اس ام اس


طبعا فتحت المسج و لقيته من صديقتي و حبيبتي و رفيجة عمري
هذا محتواها :

نافق تعيـــــــش ..وجامــــل الناس تنحب!

وبيع الضمير وتشوف الگل يجيلگ

هـــذا هــو [ الدستور [ !

إمـــا تزيـــل الصدق والا يزيلگ ..

(( هذا حال الدنيا مو ؟؟ ))


حطيت اللاب توب على صوب و دزيت لها مسج :

لا حبيبتي مو مو :P

ردت علي بمسج ثاني :

شلووون يا الذكيه مو مو الا مووو و نص :@

صراحه احب المسجات بس اذا نقاش ما ينفع

و اذا نفس رفيجتي ام راس يابس يبي لها الحجي
ينصب بأذونها فرديت لها بمسج ثاني :

اذا ولدج نايم طلعي عنه يا البخيله بدق عليييييييج و بعرف سالفة

المووو و النص و المسج مالج .

يمكن عشر دقايق و الا ام عبود داقه علي ، كلمة بخيله استفزتها لووول


ام عبود : قوووه قلب
قلب طفله : قوووتين هلا و غلا بام عبود

ام عبود : انا بخيله هااا
قلب طفله : هههههههههه يعني هذا اللي خلاج ادقين بقولج كل يوم يا البخيله .
ام عبود : يعني خطه ويا ويهج فضحتي عمرج ما راح ادق لو تقولين يا الكريمه .
قلب طفله : انزين انزين خلاص اسفين ، شنو هالمسج الحلو بكلماته و مو

حلو بمعناه و انتي يا الطيبه موافقه عليه ؟؟
ام عبود : شفيه ما فيه شي مسج واقعي 100% مع الاسف الشديد و لا

ما تشوفين شصاير بالدنيا حواليج !!
قلب طفله : اووووف كل هذا تشاؤوم ليش نخلي النفاق و الجذب و الضمير

النايم دستور حياة و نرضى بالامر الواقع لبعض البشر .
ام عبود : مو بكيفنا غصبا عنا شوفي الدنيا شلون تمشي و اللي عايشين

فيها اغلبيتهم اهل هالدستور .
قلب طفله : و المطلوب يعني نتصف بصفاتهم المذمومه و نمشي

على خطاهم عشان نعيش ؟؟!!!
ام عبود : مو بالضبط بالضبط بس نجامل على الاقل و بعدين انتي

ما تعرفين تجاملين حتى القريبين منج ترا مو دايما نقط الحجي
من غير مجامله بسيطه ، هالشي بيكره العالم فينا و يحقدون علينا .
قلب طفله : امبييييه عهوده شفيييييييج اللي تتحجى مو انتي . تدرين اني

ما احب اجرح او اضايق احد بس الحق اقوله لو شيصير و بطريقه
ما تزعل احد بس انتي تدرين ان محد يبي كلمة الحق او
الحقيقه لانها مررررره .
ام عبود : قلب تدرين اني نفسج و اكثر بس جد راح تشوفين وايد بالدنيا

و لو مشيتي عدل و سويتي اللي يرضيج ما راح يرضي غيرج
و انتي بتتوظفين و بتشوفين ياما و ياما .
قلب طفله : لحظه شطرى عليج هالحجي اكيد فيج شي او مضايقج

احد توني استوعب صج غبيه حقج علي ام بودي :(
قوووووولي شفيج لا تقولين ماكو شي اعرفج .
ام عبود : مافيني شي بس مسج و دزيته لج .
قلب طفله : عهوده ابو عبود مضايقج ؟ اذا اهو بدعي عليه دعوه

تورم اذونه تدرين بغلاتج تحجي عاااااد .
ام عبود : لا فديته حرام عليج ليت الناس نفسه ، بس مشاكل الدوام

و نفاق الناس و بيعة الضمير مصيبه و الله انصدمت بالواقع
و الظلم الحاصل .
قلب طفله : زيييييين الحمدللله دام بو عبود بعيد عن الموضوع يعني
سهالات و كل شي ينحل و الناس اجناااااااااس حبيبتي راح
ننصدم فيهم دام نخالط اشكال و ارناق منهم و بعدين انتي
تدرين ان الظلم و النفاق متفشي الله يبعدنا يارب عنهم
فليش تحرين عمرج .
ام عبود : قلب تموتين قهر لما تكرفييييين و تشتغلين من قلب و تبدعين
و غيرج ضايع بالطوشه و لا يدري عن الشغل و اخرتها بالتقارير
و التقييم انتي اقل وحده و اللي ما يستاهلون درجاتهم توب
مو ظلم مو حرام ؟؟!!
قلب طفله : انزين ليش ما ناقشتي رئيسة القسم و الناظره و طلبتي

حقج و الحق ما ينزعل منه ..
ام عبود: من صجج انتي المصيبه كلها من تحت راس هالثنتين يحبون

الجذب و النفاق و الواسطات و بخي عليهم هدايا و عزايم تلاقين
درجاتج فوق النخل اااه يا القهر و لا احد يسمع دام مضبطين
الوضع و طابخينها سوى .
قلب طفله : حبيبتي و الله شي يقهر بس قولي حسبي الله و نعم الوكيل

على من لحقتني مضرته و ربي ياخذ حقج منهم و خلج مثل ما
انتي لا تتغيرين عشان تجارينهم انتي روعه و مبدعه و مرضيه
ربج ثم ضميرج لا يهمج هالاشكال صدقيني كله عند رب العالمين
محفوظ الظلم ظلمات يا ام بودي .
ام عبود : حسبي الله و نعم الوكيل على من لحقتني مضرته .

احبج يا قلب و الله لا يحرمني منج .
قلب طفله : و لا منج عهوده ، تذكري ايام المدرسه و ايام الجامعه لما

كنا نشوف هالنماين و نقول الحمدلله احنا مومنهم و تعرفين
انج بنعمه كافي رضى الله و الله يعيني على الدوام اول ما اتوظف
باخذ عندج دوره و اعرف اطباع المصايب اللي بواجهه
صرتي خبره يا العيوز :P
ام عبود : تحت امرج يا الطفله العوده الله يوفقج يارب بمدرسة احسن

من اللي انا فيها و انا بدور لي نقل ما راح اقعد الله يعين .
قلب طفله : اميييييييييييييييين و يوفقج .
ام عبود : قللللب عبودي قام تصبحين على خير حبيبتي
قلب طفله : و انتي من اهله حياتي و لا تكدرين عمرج بوسي لي عبودي .
ام عبود : باستج العافيه باي
قلب طفله : بايات


رديت حق لاب توبي وقلت احط لكم اللي صار بيني و بين ام عبود ..

و شنو رايكم بالمسج و هل اغلب اللي حوالينا هذا دستورهم ؟؟

و نجاريهم و احنا مو نفسهم او نتم على ما احنا عليه لو كانوا الاغلبيه ؟؟

السبت، 3 مايو 2008

،،، الــ ح ــروفـــ ،،،


عشقت الحرف من صغري عرفت انه نتاج فكري
كتبت حروف ملويه ما فك شفرتها غير والديه
امسك القلم بيدي و فوقها ايد ست الحنيه
تمشيني يمين و يسار و تقول الالف مو محنيه
ابتسم و اكمل معاها مشوار الحروف الابجديه
اول املاء بحياتي كان انا اكل و اشرب لاعيش و اكبر
انتظر بخوف و ترقب كم من عشره يا ايديه
قالت الابله حيوا اختكم عشره على عشره يا بنيه
رحت اركض لها و اقول ابي تجمه حمره و ذهبيه
و هم طلبت منها تكتب لي و تعلمني كلمة احب بالكراسه المدرسيه
استغربت ليش يا حلوه كلمة احب في هالفتره الطفوليه
قلت ابي اقدم هديه بسيطه لا غلى ثنين على قلبي و عنيه
فهمتني و كتبتها و يمها ستكر ورده جوريه
بالفرصه اعتكفت بزاوية الصف المنسيه
و كتبت انا اكل و اشرب لاحب امي و ابي
احب امي / احب ابي

قرتها امي بضحكه من القلب و دموعها الماسيه
قراها ابوي ببتسامه خياليه و دعوه يتردد صداها ليه
راح تظلين يا الحروف ...
حب طفله و عشق شابه و ادمان عجوز كويتيه
احبج يا الحروف الهجائيه سواء كنتي بالعربيه او الانجليزيه