الثلاثاء، 23 ديسمبر 2008

بكل سهوله


سهله عليها تلتفت و تقول انسي اللي مضى ؟؟!!

ليش بسهوله تنهزم و عذرك لها مافي دوى

تقطع بلحظه .. زهورها و زرع(ن) بدمعها ارتوى

تبكي و تحلف انت لها و فعلك يقول امشي بنفق ماله ضوى
يا مقسى قلبا حبته و خسارة قلبا لاجل عينه انكوى ...

السبت، 13 ديسمبر 2008

الدوام يرحب بكم :)


شخباركم وشعلومكم يا حلوين عقب العيد :)

الحين عاد وقت النشاط و الجد و الاجتهاد باجر دوامات

اضحك و ابتسم للحياه D:

اليوم المسجات تهل علي من كذا شخص

و كلهم نفس المسج :

(( عزيزي الموظف انت على وشك استهلاك حدك
الائتماني في رحلة التسدح و التبطح و السهر علما
ان الخدمة ستنتهي اليوم و شكرا ...
اشترك معنا في خدمة
{{ ذكرني و نكد علي }} ))

لوووووووووول يا حلوهم شعورهم مشترك

عاد قلت بصير احسن منهم و اشجعكم

يا ربعي المدونين :P~

ناموا مبجر لا تعلون قلب اللي يقعدونكم

و لا ترقعون الموبايلات بالطوفه لنبهتكم ^_*

اتمنى لكم بداية اسبوع سعيده :))

يلاااا فتكوااا بعافيه ...

الأحد، 7 ديسمبر 2008

كل عيد لحمه و انتم بخير :)




الجمعة، 21 نوفمبر 2008

الوطن للافراح و ليالي الملاح !!

صباح الخير // مساء الخير

ازيكم قميعا ان شاء الله كويسين :)

يا محفوظين السلامه سمعتوا عن الوطن للافراح ؟!

بصراحه انا ما سمعت و لا ادري عنها بس الخميس


و انا راده من الدوام لقيت بالصالة ظرف بطاقة

دعوة لعرس لونه اسود و كبيييير على بطاقة عرس

المهم الدعوه حق امي و كريمتها اللي اهي انا احم احم


فتحته و الا اشووووف جريدة الوطن بحجم جرايد

الاعلانات و طلعت هالجريده اهي الدعوه @@

(( بطاقة العرس )) و الا المعرس منو ؟؟؟؟؟

رفيجي و زميلي الشيطان ايام الروضه D:

بصراحه حده الفكره غريبه و عجيبه بس عادي


اهو واحد يحب الفناتق الله يوفقه يارب و يهنيه

و عقبال عندكم قميييييييييعا يا انسات و يا عزابيه :)

عاد الحين شوفوا الجريده اقصد البطاقه ...




















السبت، 8 نوفمبر 2008

شعلي انا من الناس و شعلى الناس مني



يقووولوووون : من راااااقب الناس مات هما

بس الملاحظ و المتوفر عندنا بالديره ان اللي يراقب

الناس و يتدخل بخصوصياتهم و يقط اذونه مع اللي

يسولفون بما يعنيهم ما يموتون هما الا يموتون من

بلاغة الشف و حب الاستطلاع اللي على غير سنع .

شي فضيع الانسان اللي السانه يتعلج بخلق الله

حطوا ، قالوا ، سووا ، اشتروا ، اتزوجوا ،

اتطلقوا ، عنسوا الخ ...


** المشهد الاول :

زوج و زوجته كاشخين و متماسكين الايدين

ع البحر جنهم طيور حب ما شاء الله يسولفون

و يضحكون مروا على نسرتين اقصد حرمتين

قاعدين ع الكرسي طاااااااايحين فيهم خزززز

من فوق لتحت و لما تعدوهم لفوا

على بعض و بدا القراض :


النسره 1 : شفتيييييي هالاثنين اللي مروا شكلهم متواعدين
النسره 2 : لا ما ظنتي شكلهم معاريس توهم
النسره 1 : انزين واذا معاريس متماسكين الايدين شنوو بينحاشون عن بعض و لا بيراون الناس .
النسره 2 : ما عليج هذا البدايه دلع وحب و عقبها بيلعن الساعه اللي مسك فيها ايدها .

النسره 1 : ويييييييييييع مو لايق عليهم .
النسره 2 : أي مو لايق اقوول قومي قومي نتمشى مليت من القعده .


** المشهد الثاني :


في قاعة عرس و الناس فرحانين و الاغاني ترقع

و الابتسامه مرسومه على وجوه الحاضرين عاد

العالم الله هل هي ابتسامة فرح ام ابتسامة مجامله

ام ابتسامة صفراء تخفي خلفها قلوب حقوده ؟!!
على انغام اغنية هب السعد بصوت فطومه و دخول

عروس جميله لقاعة الحفل تلتفت ام لسان على اختها

ام لسانين و بنتها و تساسرهم :


ام لسان : شوفي العروس شلون مهوله بعمرها بالتسريحه و المكياج طبقات ؟!
ام لسانين : مسكينه ما تدري شتغبر بعمرها عشان تطلع حلوه .
ام لسان : انا ما ادري ام خالد شلون اختارتها لولدها جيكره و كبيره ترا عانس طاحت بجبد اهلها بس الحظ .
ام لسانين : ام خالد انعمت يوم اخذتها و لا البني شكثرهم و شحلوهم ما لقت الا بنت ام عبدالله بس انا اقول مو منها من الطبوب اللي تسويهم امها عشان تمشي نصيبها الله لا يبلينا .
ام لسان: أي اكيييد و لا شلون تزوجت هالشيفه خنت حيلي يا بنيتي اصغر منها و احلى و لا التفتت لها ام خالد هذا و احنا جيران و اهل مالت عليها و على ولدها .
ام لسانين : @@ بنتج اصغر من العروس؟! خبري فيها اكبر منها بخمس سنين .
ام لسان : تندسها بكوعها عمى بعينج بنتي اصغر و احلى شفيييييييييج قمتي تخورينه .
ام لسانين : هاا @@ أي صاجه صاجه نسيت .
بنت ام لسان : بس صوتكم عالي ما تعرفون تسكتون لما نرد البيت .
دخل المعرس القاعه و باس راس عروسته و قعد يمها
ام لسان : الله يا الدنيا هذا خالد اللي توقعته بيصير نسيبي صار نسيب ام عبدالله .
ام لسانين : ما عليج اهم الخسرانين و باجر تسمعين المصايب بينهم .
بنت ام لسان: شحلااااته و الله ما تستاهله مهيوه صج يا خالد انك عمى قلب مفتح عين .
خرج المعرس و العروس متماسكين الايدين و الفرح يلفهم الي عش الزوجيه .
فزت ام لسان و ام لسانين و بنتها جنهم مقروصين لام المعرس يباركون

و يهنون و منها لباب القاعه و سيارتهم بعدها لبيتهم

ليتم تكملة القرض بخالد و عروسه !!


** المشهد الثالث :


ديوانية مليانه شباب اللي متابع للتلفزيون و اللي قاعدين
بجهه مجابلين اللاب توب و اللي قاعدين يلعبون
جنجفه و يسولفون بما يعنيهم .
فجاه و الا صوت هرنات متواصله برا الدوانيه طلوا
يشوفون منو و الا صاحبهم بدر يضحك و يأشر لهم
يطلعون له مشتري سياره يديده و يبي يراويهم الكل
طلع يبارك له بالسياره و ردوا الدوانيه وعلى
طرف قعد بدر و عزيز و محمد


عزيز : ما شاء الله الموتر عجيب الله يعطيك من خيره و يكافيك شره .
محمد : أي و الله الله يبارك لك فيه ويستر عليك من العين .
بدر : الله يبارك فيكم و يسلمكم ما قصرتوا .
دش عليهم عرض سعود : و الله منت هين يا بدر كله تشكى من الفقر و قلة الفلوس شلون الحين تطلع لنا بهالموتر !! من وين لك لا يكون طلع في بيتكم بير نفط ؟!
بدر: الله يهداك يا سعود يعني بالله بايق بنك و لا مهرب مخدرات ماخذها اقساط الله يعين عليها .
سعود : علينا بدور علينا معاشك يا الله يكفيك يقولون انك مرافج فلان الفلاني و اهو شاري لك هالسياره هديه مقيوله من جاور السعيد يسعد .
بدر : شكو فلان الفلاني هذا رفيجي من ايام الدراسه و لا له شغل بسيارتي و لا حياتي انا ما اطر من احد و لا اعيش على هدايا الغير عيب هالحجي مو كل شي ينقال تصدقه هذا و انا رفيجك و تعرفني .
سعود : خلاص يبا يا كلمه و ردي مكانج ترا سالناك ما اتهمناك .
بدر: انا ماشي سلاااام

المشهد الرابع و المشهد الخامس و المشهد السادس و المشهد العشرين

و المشهد الالف و إلى ماله نهاية دام البشر حشارين نفسهم بشي

ما يخصهم و داخلين بنوايا و هموم الاخرين .

لو هالنوعيه من البشر يقولون يارب الناس كافنا شر الناس جان احنا بخير :)

اهداء لكم اغنية الجميري
^_^

الاثنين، 20 أكتوبر 2008

سويلفات حريم

حريم أول سنع و جمال و عقل و ثقل .
الوحده منهم تتفانى بخدمة الزوج و العيال
و قبلهم رضى ربها عليها .
سوالفهم و مواقفهم بذاك الوقت ، اليوم
نستسقي منها الحكم و نقول الله يرحم الاولين
في حياتهم البسيطه و شقاهم نلاقي العبره .

اكو فكره عند اغلب الحريم و متفقين
عليها اهي ان اذا الزوج بدأ ينتقد زوجته
و يطلع عيوبها و قام يشوف فيها اللي ما كان
يشوفه من قبل فهذا شايف له شوفه و تملل منها
و يبي العذر عشان يخليها او يتزوج عليها !!

هالفكره برأس حريم امس و حريم اليوم
و براسي انا بعد لاني محسوبه
على الاطفال و على الحريم لووول

و في قصه قديمه كانت تقولها امي العوده
عن وحده لما انخطبت بنتها و ملجت
و بدوا يزهبون دزتها سوت لبنتها قلادة
من خرز ملون و حطت بين هالخرز
دمنت خروف وحده ما تبين و نادت البنت
و قالت لها : هالخرز لا يطيح من رقبتج
ابد خليج لابسته على طول .
البنت عجبها بس انتبهت لدمنه اللي
بين الخرز و قالت: ليش يما حطيتيها
فشله شنو بيقول الريال عني .
ردت عليها الام : ما لج شغل خليها برقبتج
و متى ما شافها زوجج و قالج شي عنها
اعرفي انه قام يدقق فيج و يطلع عيوبج
و ما يبيج حزتها لمي قشج و تعالي
البنت احفظت كلام امها و لبست الخرز
و تزوجت و عاشت بسعاده و صار عندها
صبيان و بنات و هالخرز برقبتها
و لا انتبه للدمنه اللي فيه .
و بيوم و اهي قاعده جدامه تصب له جاي
قالها ام فلان شنو هاللي حاطته برقبتج و
يقرب يشوفه رد عليها ويع احد يحط دمنه
برقبته و قام يتأفف منها اهي انصدمت و
ذكرت حجي امها لها قبل عرسها و
قالت له توك تشوفها عقب هالسنين !!
شالت قشها و عيالها و راحت لبيت اهلها .
و الزوج الحبيب دور له على عروس
هذا اذا ما كان حاط عينه عليها قبل تروح
زوجته لاهلها .
عقب هالقصه القديمه صج الرياييل لبغوا
الفكه من المره قاموا يطلعون فيها العذاريب
و الاطط الفطسانه على قولة المصريين .
يعني على الاقل لو فيها عيوب ناقشها
حاول تغير الغير مرغوب فيها مو
تغيرها كلها جنها اثاث و راحت
موضته و يتغير بالكامل :@
حطيت هالبوست و السبه سالفة سمعتها
بالدوام عن وحده ريلها يموت فيها و
عقب عشرة عمر قام يحط فيها عيوب الدنيا
و الدين عشان يكون له حجه يتزوج عليها :(

اقووووووووووول
معشر الحريم مو تقعدون تشكووون عقب
هالبوست برياييلكم لنتبه لشي عندج او فيج
تقولين اييييي هذا شايف له شوفه انا مالي شغل :x

و انتوا معشر الرجاااااال انا ما احرض عليكم
لا سمح الله ابدا ابدا بس انبهكم ان
المره ذكيه مو غبيه :p~

الجمعة، 17 أكتوبر 2008

من بين زحمة الشغل و دثرة الكتب قلب طفله تطل عليكم من جديد



مساء الورد / صباح الياسمين

شلووونكم و شخباااركم يا ربعي

ان شاء الله تكونون بخير

حدي مدي فاقدتكم بس الشغل و زحمته

و عطلة العيد و غياب الطالبات برمضان

ضيعنا تاخير بالمنهج و الامتحانات ع الابواب

يعني ركض بالدوام و حصص اضافيه و في

البيت تحضير و وسائل و نوم بكير ابدا مفيش

وقت للنت الا اذا بطلع معلومه فاسترق النظر

لمدوناتكم و لا اقدر ارد مااافي وقت و الشي
المضحك اني ما افتح مدونتي مع ان عندي
حجييي و سوالف ..
تدرون عاد عرفت قيمة الويك اند و حبيته
اكثر من لما كنت طالبه لول
كلكم كنتوا طلبه و تعرفون شلون كنا نمووت

بالعطله فشلون لما اقول لكم حبيتها اكثر

من قبل معناتها قمت اعشقها لووووول

مع هذا اوله ع البنات و الدوام و الجرس << تعقدت

** سر صغير ترا المدونات ادمااااااان من يدشهم
ما يقدر يبعد عنهم
زي مية النيل اللي يشرب منها يرقع لها تاني **
pP:

الاثنين، 29 سبتمبر 2008

عيدكم مبارك


--(( كل عام و انتم بخير ))--
--(( عيدكم مبارك و تقبل الله طاعتكم ))--
صج قبل انسى كل من يدخل ياخذ عيديته و كاهي العايدي




و هم قبل انسى اللي ياخذ عيديه يحط لي
عيديه مثل اللي اخذها خو انا قلب طفله
يعني ابي العيادي عشان اروح الالعاب :P





الأحد، 21 سبتمبر 2008

تحلطم ابلات



السلامووو عليكووو

شلونكم شخباركم

حدي مشتاقه لكم و مشتاقه للحوسه في بلوقاتكم

بس لضروره احكام شغل لراس


و ايام مباركه يعني حده محتاسه

حبيت اتحلطم و اطلع اللي بقلبي قبل امتنع عنه


بيوم 22 سبتمبر و انجعم


مع ولد اخو العمه و باجي الربع :p

الحديث الداير باوساط المعلمات المحبات للتدريس اهو :

1- ليش من البدايه ما عطونا عطله مثل الناس

برمضان حسبي الله على اللي كان السبب

و دعاوي تخرررع و اعصاب نونه معقوده

انا : استغفر الله العظيم ارمضان يا ابلات

احتسبوا الاجر خلاص ما بقى شي.

خزوني ذيج الخزات اللي معناها يقول انجعمي لا بالكتاب

<< و لكم ان تتخيلون جم كتاب على طاولة كل وحده فيهم لووول
2- ليش يعطونا مناااااااااوبه و الدنيا غبار :@

أي و الله أي و الله انا معاهم شحقه موقفينا

على كل درج و نزلوا البنات بالساحه

و طلعوهم من الصفوف و الدنيا غباااار

قلت حرام البنات يتعبون من الغبار خلوهم

بالصفوف لااااا يا ابله ما يصير ووووو ..


انزين كيفكم كيفكم

و كل شوي طالبه طاله بويهي

طالبه 1 :

ابله انا عندي حساسيه ما اقدر ممكن ادخل الصف
طالبه 2 :

ابله عيوني قامت تعورني من الغبار ممكن ادخل الصف
طالبه 3 :

ابله بودي جنطتي ثقيله عورتني و ما اقدر احطها بالساحه غبار


انا : حبيبتي ممنوع كا احنا معاكم واقفين بالساحه


امبيه احاجيهم و ودي ابجي على حالهم اشكالهم

تعور القلب طبعا اسوي نفسي قويه و

انا ضد امر الاداره التعسفي :@

اخرتهاااااا وقفوا البنات بالطابور و قالوا لهم

ردوا صفوفكم مافي طابور !!!!!!!!

بالذمه مو شي يقهرررر من الاول ليش هالعذاب لهم و لنا :(

3- مختبرات قرررررعه وين استعداد وزارة التربية

و تجهيزاتها الكامله اللي تقول عنها حضرت الوزيره !!

صج عاد المختبرات فاضيه اللهم من

الكراسي و السبوره المكسور شي يفشل

ديره غنيه و مدارس يديده توها كملت

سنه جذي حالها .

4- المدرسه زباله (( مكرم السامع والقارئ ))

ماكو نظافه ابد و البنغاليات من عقب الثوره

اللي سووها علينا كبراان راسهم

يا ماله الكسر << معصبه


عيل ينادون وحده فيهم تقول

ما يقدر ما يقدر في سوغل وايد و لا تحقر @@

الاقسام كلها تتحلطم عليهم و زف فيهم بس

قواة البااااااس عندهم مو هينه و الناظره

تقول مساكين ما يلحقون
انزين امنا بالله ما يلحقون من كثر الشغل

ليش عيل بكل زاويه نلاقيهم متمغطين جنهم

عتاويه و طايحين له سوالف وين الشغل !!

مع هذا حبيت التدريس و البنات يهبلون

و القسم عسل بس لو الله يفكنا و يفكهم من

التحلطم حنكون بالف خير بس عاد نبي

مسكنات اذا بنكتم اللي فينا لووول

الأحد، 31 أغسطس 2008

مبارك عليكم الشهر










السبت، 30 أغسطس 2008

تحيا قمهورية مصر العربية



صباح الورد / مساء الورد

طبعا هالبوست موجز ليومي الاول

بالدورة اللي محسوبه علينا دوام

اول يوم لي بدورة المعلمين الجدد قعدت

من النوم نشيطه و قبل المنبه ..
طبعا نومتي كلها ما وصلت ساعتين على بعض افكر

بكل شي في هالدوره و بالناس الموجودين فيها

بسوي جذي و بيصير جذي وووووو .

صارت الساعه 7 فزيت اتزهب و اتكشخ و قبل كل

شي مقعده ابوي اللي ابيه يوديني لا تضحكون

العذر ما ادل المدرسه اللي فيها الدورة لووووووول

و خلصت و توجهنا للمدرسه الناس اللي يدشون شكلهم

غريب جني رايحه محاميد خيطان ما في و لا كويتيه

او كويتي و الباصات سطره يم الباب @@

نزلت من السياره و اسمع دعوات ابوي الغالي ذكرني

باول يوم من كل عام يوديني و انا طالبه للمدرسه

بس هالمره انا ابله على قولة الغالي الدنيا تركض :)

المهم دشيت المدرسه و دخلت المسرح اللي فيه

المحاضره و الا ششووووووف الكراسي ملياااااااااانه

اوادم ملابسهم ملونه بكل لون عرفته البشريه و الالوان

اللي تكسر العييييييييييييييييين طبعا انا شكيت اني

بالمدرسه الغلط بس كملت ادور لي كرسي فاضي

مااا لقيت الا اخر شي بعد زين حصلت وقعدت و انا

اقول يا قلب طفله المكان غلط اطلعي لان الموجودين

كلهم من الجاليه المصريه ..

و الصوت تبارك الرحمن جنه بحي من احيائهم

الشعبيه و شكيت ان انا الكويتيه الوحيده :(
رفعت راسي و نزلت النظاره قريت اللوحه المعلقه :

مرحبا بكم في دورة المعلمات و المعلمين الجدد ادور

كلمة المصرين ما لقيت حسيت اني مو بالكويت

نظراتهم تخرع امبيه انا شيابني عندهم .

اتلفت يمين يسار جود اشوف كويتي و لا كويتيه

ماكو صبرت لما انترست الصاله و في اوادم موقفين بعد

و اخيرا دشوا كويتين اللي يحاضرون بالدوره

اووووف ارتحت و تاكدت ان مكاني صح .

الترحيب مالهم :

كل عام و انتم بخير و اهلا و سهلا بكم اخواني و اخواتي
في بلدكم الثاني الكويت و نتمنى لكم طيب الاقامه .

انا @@ بقلبي شنووو بلدكم الثاني

و الا اسمع صوت وراااا شسالفه مو حاسبينا

يعني احنا مو كويتين ؟؟!!

التفت بسرررعه و الا اشوف تقريبا 7 ابلات

كويتيات جدد مخترعين مثل حلاتي من

الغزو المصري لووووووووووووول
ضحكت من الفرحه و من الموقف يعني في

كويتيات غيري بس مو محسوبين سكت و

قمت اسمع و اراقب فجأه الناس اللي كانوا

شايلين الصاله بصوتهم هدووء و طلعوا

الاوراق و الاقلام و اشتغلوا كتبه لووووول


لهنيه كل حاقه شبه طبيعيه لما قالوا تفضلوا

وقعوا الحضور ما ادري شصار جنهم

قايلين انحاااشوا زلزال @@


حاطين كشوف الاسماء على الطاولات ورا و

الاخوات كل وحده ادز الثانيه و اتل الورقه و صراخ

تعالي يا سالي .. فينك يا ايمان .. سقلي اسمي

يا زينب و النبي و ابعدي شويه و دز بالجتوف

و بالايدين حشى طابور الخبز عندهم اهون لا

و اخر شي شققوا الكشف مال الاسماء

و يتخانقون ع الجاي و البسكوت اللي حاطينه

ع الطاولات ع بالهم ذربين


و انا و بنات ديرتي واقفين من بعيد نطالع

و نتحمد الله على العقل هذول اللي بيربون

اجيال و بيرتبون الطلاب يبي لهم من يرتبهم .


عشان الكشوف تشققت فما في توقيع انصراف

المسؤولين عن الدوره تخرعوا لوووووول


لا و انا طالعه عند الباب اللي شكبره شعرضه

يدزون واااي ذكروني بالهده ايام قبل لا

و حاشني الطشار وحده من المعلمات اللي مربيه

لها عضلات تبارك الرحمن من كثر ما تخابط

بيدينها تعلق اسوارها اللي جنه تاير تريله

مدبب من كل صوب بملابسي و تلتني معاها

من هول الصدمه ما ادري شقول @@

يا حجه و لا يا معلم و لا يا حنفي امبيه انطرمت

التفت علي بكل برود معلش و كملت طريجها

بنفس الاسلوب و انا اعابل بجمي

اللي انتل منه خيط و صار زم هههههههههههه

ما ادري حزتها كنت ابي ابجي من هالبشر

اللي ما ادري شلون تخرجوا من جامعه و

بيصيرون ابلات لا و مو صغار حريم كبار بالسن .

انا اقول يبي لنا كل يوم نحيي النشيد المصري

و نقول تحيا قمهوريه مصر العربيه ثلاث مرات

قبل توقيع الحضور و قبل توقيع الانصراف

جود يهدون و يخلونا نوقع معاهم :(

عرفت من المحاضرين ان العدد الاجمالي للمعلمين

الجدد 400 معلم و معلمه مصري و مصريه و

منهم 35 كويتيه فقط و هذول ما شاء الله

اللي بمنطقتنا التعليميه بس .


ما ادري شقول من صدمتي الدورة كلها خربوطه

اعاده للي اخذناه بالجامعه و اشياء يعرفها

الطالب قبل المعلم كل هذا عشان حبايبنا المعلمين

الجدد من قمهورية مصر العربيه انزين احنا شكووو

ماكو زود بدورتهم يضيفونه لنا و لا ترتيب

نفس خلق الله ..

عدى اسبوع و باقي اسبوع حيعدي على خير بإذن الله .

الأحد، 24 أغسطس 2008

مباشرة عمل




بعد التخرج كمعلمة علوم و اجازه طويله


نسبيا ابدا مباشرة العمل الاحد 24/ 8 / 2008


في دورة المعلمات الجدد .

لا اعلم كيف اصف شعوري فهو مزيج من


عدة احاسيس تنتابني الان

فرحه ، خووووف ، ارتباك ..

تعودت على السهر و النوم المعفوس فوق تحت بعد

تخرجي فيبي لي الحين يتعدل يومي المخربط

انا بطبيعتي احمل روح طفله عنيده طيبه


مرحه صادقه خجوله فما ادري

هالطفله راح تقدر تتاقلم باجر مع جو المدرسات


اللي كانت تحسبهم عالم غيييييير


عن عالمها لما كانت طالبه !!

صحيح انهيت التربيه العمليه و جربت التدريس


و حصدت حب الطالبات اللي كنت بينهم و كاني


بين خواتي اللي بعمرهم صرت صديقتهم و المصيبه

لما كنت اعصب عليهم يستغربون ابله لا تتصنعين


العصبيه ما يلوق عليج امبيه حدي مفضوحه لووول .

و الحمدلله المعلمات اللي حولي و الاداره حبوني


و اعتبروني اختهم الصغيره بس الفرق اني كنت


طالبة بالجامعه و تربية عملي لكن الحين ابله


صجيه معتمده و مع سبق الاصرار و الترصد لوووول

طبعا النوم بتصيده الليله من المحاتاة


عاد من اليوم و رايح شعاري

بيكون نام بكير تصحى بكير

ابله مجتهده مو ؟؟


تصبحون على خير و دعواتكم

الأحد، 17 أغسطس 2008

إبتسامات شعرية






إبتسامات شعرية من ديوان عابرة سبيل



من كثر ما حبيت هالديوان حفظته



شعر شعبي راااااائع لشاعره كويتيه



كل اللي اعرفه عنها انها توفت الله يرحمها

حبيت تشاركوني هالابتسامات ..

---------------------------------

هبيل بلاه الله

أنا لي ثمان سنين متولعه و اغليه
و على جملة اهل الحقد و العذل محتجه
كتبت القصايد كلها يا جماعه فيه
عليه الحشا مثل القراطيس بالعجه
عقب هالعمر يسأل قصايدك من هو فيه ؟
يا ويل قلبي كان نشدته من صجه
انا ودي اطقه و اخاف اتوثم فيه
هبيل بلاه الله في بنت مرتجه

****


ريجيم

دوم يعيرني يقول انتي متين
حلجك المفتوح لازم نغلقه
هيه يا دبه لزوم تخففين
و الا اثور فيك عشرين فشقه
و في رجيمي استمريت اسنتين
جدي اللي مات بغيت الحقه
ويش رايك ؟ قلتها بصوت حزين
قال دبه و انقلبتي لي اسلقه


****

يا عنتر

لي صاحب منه تبي تطلع الروح
خبل و من هي تولع فيه .. خبله
عامين المح له مع الجد و مزوح
و اقول يا عنتر تناديك عبله
طال المدى ثم قلت انا اغليك يا لوح
مجروحه جرح مخاطره عجله
دنق و قال انا من العام مجروح
و اشر لجرح مبطي وسط رجله


****

العنز

تطورت العنز مع من تطور
و لاهوب مقصور التطور على الناس
عقب الربيع الزين و الخد الاخضر
قامت تعلك بالمدينه بقرطاس
ترضع صخلها من حليب مبستر
تخشى رشاقتها مع الوقت تنداس
باقي قليل و يشرب التيس (( منكر ))
و يروج الهروين راعي و عساس

****
يا خبلي الغايب .. متى ترد للعين
متى اشوفك او تجيني رساله
صحيح بالدنيا خبول كثيرين
لكن خبالك يا حياتي لحاله


****

يا ناس وين (( اسبنش )) باباي
باعطيه خلن نقل همي
حتى يصارع جميع اعداي
و اول ما يذبح ولد عمي

الأربعاء، 13 أغسطس 2008

نورتي البيت



بعد شهرين قضيتيهم بعيده عنا في احدى مستشفيات
امريكا ثم 8 أشهر ثقيله و كئيبه بمستشفى لا يبعد
عن منزلنا الكثير و قبله معاناة 5 سنوات .

اشتقنااااااااااا لج و لوجودج في البيت
اشتقناااااااا لسوالفج الحلوه
اشتقناااااا لازعاجج و عنادج
اشتقنا لاختنا الصغيره الغاليه اللي كبرت
و كبر معاها تعبها و المها اللي ندعي ربي
ليل و نهار يفرج لها و يشافيها و يحفظها لنا .

تدرين حبيبتي انج بعيوني و عيون كل من
عرفج رمز الصبر و الحب و الايمان متجسد بطفله .

تدرين حصوص انج بالنسبه لنا الامل اللي
بأّذن الله ما ينفقد و بيزيد و بيزيد
دام نشوف عيونج و نلمح ضحكتج .

لما تسالينا بكل براءة الطفوله منو فيكم يحبني اكثر ؟

و تشوفين التنافس بين اخوانج و خواتج
و تسمعين ردودهم: انا طبعا ، لا انا ،
افااا يعني ما تدرين انا اموت فيج ..
و انتي تضحكين و تقولين انا احبكم اكثر ..
ياااا الله لو تدرين شكثر نحبج شكثر نتمنى تردين
مثل قبل شكثر نغليييج و نتقطع على حالج .

تطالعين الصوب الثاني اللي قاعدين فيه
امي و ابوي يبتسمون لج و تاشرين عليهم
و تردين علينا و انتي مبوزه بس احبهم اكثر منكم .
حزتها نقوم عليج تدلدغ و تقرص و تضحكين
شحلات ضحكتج اللي نتشفق عليها حتى لو
ما كانت من القلب و خلاها المرض تبهت .

اختي الحبيبه ولدتي لتكوني خلفا لها ..
ولدتي لتكوني عوضا عنها لنا ..
ولدتي لنرى بعينيك خير الدنيا كله ..
ولدتي لتكوني نسخه عنها بكل شي طيبتها ،
حنانها ، كلامها ، جمال روحها النادر
، حتى حركاتها ..

سبحان الله انولدتي بعد وفاتها باسبوع و تسميتي
على اسمها واصبحتي امنا العوده و اختنا الصغيره .

نورتي البيت و نورتي حياتنا برجعتج
الله يخليج لنا و يحفظج و يشفيج
و كل مريض يارب العالمين
.

الاثنين، 4 أغسطس 2008

الجيران


قال رسول الله صلى الله عليه وسلم :
(( والله لايؤمن .. والله لايؤمن .. والله لايؤمن
قيل : من يا رسول الله ؟!
قال : من لا يأمن جاره بوائقه )) .
قيل : يا رسول الله . ما حق الجار على الجار ؟
قال : (( إن استقرضك أقرضته ، وإن دعاك أجبته ،
وإن مرض عدته ، وإن استعان بك أعنته ،
وإن أصابه خير هنيته ،وإن مات شهدته ،
وإن غاب حفظته ، ولا تؤذه بقتار قدرك إلا أن تهدي إليه ))
هل يا ترى جيران الماضي نفسهم جيران الحاضر
و لا اختلفوا و اختلف معاهم معنى الجيره ؟؟

السبت، 2 أغسطس 2008

لن ننسى



لن انسى ما حييت ...

يوم الخميس الاسود 2 / 8 / 1990

يوم الغدر و الخيانه

يوم الرعب و الاهانه

يوم الخبث و الحقد تجلى بصورة نذل فتك بجيرانه

يوم ترويع الامنين و تشريد اهل الطيب و الامانه

يوم عرفنا فيه منهو الصديق و منهو العدو

يوم تبعه 7 شهور الكويت كانت فيها اسيره و جريحه

يوم عرفنا فيه غلا الكويت بقلوبنا رغم صغر سنا

يوم فزيت فيه من نومي على صراخ و حركه مو طبيعيه


اشوف الصدمه بعيون الكل و الدموع

من عيونهم تحجي حسره و مراره .

الكل متجمع في بيتنا شصار و ليش كل هذا ؟


اسال و لا احد يرد علي اسمع العراقيين دشوا

الكويت قمت ابجي و انا اسمع دوي المدافع

تهز البيت و لا ادري شنو هالرعب اللي فتحت

عيني عليه الملم العابي و اقعد بحظن امي العوده

تبجي و تسكتني و تقول مافي الا العافيه

امسح دموعها و اقول ليش تبجين تسكت

و تنادي عمتي تاخذني مع اليهال

ناكل شي و نلهى عن الوضع المفزع عندهم .

طفله ما تعدى عمري 7 سنوات


اتذكر اللي صار لحظه بلحظه ..

يا الله للحين و انا كل ما تذكرت هاليوم احس


بخووووف و ضيقة صدر و دموعي تنزل

غصبا عني اللي مر بالكويت و اهلها مو شويه :(

حسبي الله و نعم الوكيل .. حسبي الله و نعم الوكيل

يوم راح يبقى و يبقى بذاكرتي


و ذاكرة كل كويتي و كويتيه

يوم ما انساه طوووول ما ربي كاتب لي عمر .

اللهم لك الحمد على التحرير و رجوع الحق لاهله

اللهم ارحم شهدائنا و ارحم اسرانا


و احفظ هذا البلد امنا

الله لا يعيد الشر

و يحفظج يا ديرتي و اهلج من كل مكرووه


**(( وطـن الـــنــهــار ))**


الأربعاء، 23 يوليو 2008

خطوات ...


اسير في دربا لا اعلم نهايته اخطو بنهم على اثار اقدامك

اثارا خلفتها حينما امطرت الدنيا و هممت بالرحيل

اذكر اني تجمدت في مكاني لا اشعر بجسدي و لا بزماني

تتسابق قطرات المطر و دموعي بالسير على تمثالي

اكانت حالي من بردا جمد دمائي ام صدمتا هشمت كياني

ابعد ان اقحمتني بالحب تجفاني ؟!

صرخت لك بكل قوتي و بقايا الدفء بعظامي

احبك يا من تجبر و طغى على قلبي الذي يعاني

احبك بعيوبك قبل ميزاتك .. احبك بعنادك قبل استسلامك

احبك بغرورك قبل تواضعك .. احبك بطيشك قبل عقلك

احب نفسي بعيونك قبل عيون غيرك

اجد نفسي عاجزه عن اكمال المسير ..
لان اثارك تلاشت عن الدرب

اقف هناك تائهه منتظره لمن احببت ...

هل ستعود و تفي بالوعود .
..
و ارى بقربك الدنيا ملىء بالورود ؟!؟

الاثنين، 14 يوليو 2008

شعوري لحظة الفوز :P

السلام عليكم و رحمة الله و بركاته
سيداتي انساتي سادتي اكتب هذا البوست
نتيجة فرحتي العارمه بمناسبة فوزي
في مسابقة اقامتها العزيزه شلالات في
مدونتها العامره و ايضا بسبب طرح
سؤال جميل جدا يطرحه تلفزيون
دولة الكويت على كل فايز بمسابقات
رمضان :P
سالتني هالسؤال الغاليه المتقاعده كويت
بصراحه اول مره افوز بمسابقه و
بعد جهدا جهيييييييد فقد كنت انتظر
نزول البوست قبل الساعه 12
و لكن يخوني الجهاز مرات
و ما يطلع عندي انه نزل الا
بعد الساعه 2 او اكثر و تكون
الطيور طارت برزاقها
و انا حظا اوفر لوووووووول
طبعا الف مبروووك لكل اللي
فازوا قبلي و بالعافيه عليهم الهدايا .
و ترليون مبرووووك حقي لاني
و اخيرا فزت بشي و اخذت من وراه
هديه انفجت عقدتي و عقبال
اخوي براك يربح بكل المسابقات
و السحوبات اللي يدخلها :)
هذي هديتي تسلمين شلالات^_^







و سؤال كويت هو :


شنو شعورج و انتي فايزه ؟؟

احم احم شعوري لحظة الفوز شعور

لا يوصف فقد صرخت كثيرا لما وجدت

انني اول من اجاب عن السؤال حتى

خرعت امي بنص الليل لوووووووول

و احب ان اشكر شلالات لاتاحتها هذه الفرصه

الثمينه و اشكر الامه العربيه و الاسلاميه على

وقفتها المشرفه معي و ابارك للقاده العرب

بمناسبة قدوم شهر رمضان المبارك من الان

و ربنا يعمر بيوت المسلمين و يخرب بيوت

اليهود اصل انا فرحانه اوي اوي و مقدراش

اعبر عن الفرحه اللي قوايه الدموع خير تعبير

بس الكاميرا فين لو سمحتي D:
و عقبال عندكم جميعا :)))))

الأربعاء، 9 يوليو 2008

_-_سقى الله يوم أنا طفله_-_




سقى الله يوم أنا " طفلة "وأنام ولا أحد قدي !


ولا أحاكي هموم اليوم ..


ولاأنطر أمل بكرة ...


تداعب أمي شعراتي ...


وتمسح يدها خدي ...


ونومي هادي وساكن . . .


( رعانا الرب في ستره ) ,,,


تلاعب يدي " الدمية "


وعندي هالزمن وردي ....


همومي لعبتي ضاعت ...


وعندي هم وش كبره ؟


كبرت ...


وزادت همومي وأحس ان الزمن ضدي . .


كبرت ونظرة < الطفلة >


تعيش بداخلي فطرة !!


كبــــرت ... وعشت هالدنيا


كبـــــرت ... ولا هو بيدي !!!


كبرت بشكلي ورسمــــــــي


وقلبي باااااااقي بصغره . . . .


وصار الهم يلعب بي مثل دميـــــاتي في يدي !!!


وأسهر ليلي بطوله ويعلن رحلته فجرهـ


يـــــــــــــــالــــــــيــــــــــت


وليت أنا " طفـــلـــة "


وأنام ولا أحد قدي !


ولا أحاكي هموم اليوم


ولا أنطر أمل بكرة ,,,,



انشودة اكثر من رائعه كلمات و اداء (^_^)