الاثنين، 16 أغسطس 2010

لقيمات القرع من صنع ايديا :)


احم احم لقيمات من صنع ايديني شي مو غريب
بما اني من سنتين و انا ابي اريح الغاليه امي كنت اخليها
تسوي العجين و اصب اللقيمات عنها
شعور يهبل لما يطلعون مدورين حلوين سليمين من
الاعاقه و من غير قرون او ايدين و اريول :)
استانس اطلع ابشر البيت كله انا سويتهم لووول
و لكن الصج الصج ما كنت اعرف مقادير العجينه بس
حبيت اتعلم هالسنه فما سالت امي لاني ابي افاجئها
سالت حبيبتي و الغاليه على قلبي رفيجتي قالت لي بعطيج
طريقة لقيمات يديده بالقرع @@ انا بصراحه انصدمت
شكووو القرع ابي مقادير لقيمات يا حلوه مو مرقة !!
المهم اقنعتني انها تهبل و طعمها مميز
و اطلع فيها جدام ماماتي هههههههه
قمت مبجر و تسحبت للمطبخ قبل امي و عجنتها و كاهي الصوره



بعدين عقب ما خمرت و صار وقت اني اصبهم صورتهم
و اهمه يسبحون بالزيت :)


و اهني عقب ما خلصتهم و شيرتهم رحت اركض بالصينيه من مكان لمكان
و امي تناديني ياربي ما انلام انجاز سويتهم من الالف ليما الياء لوووووول


و اهني الصوره اقرب و الاهم ان طعمهم حلووو
ما قصرت صاحبة الوصفه ^_*



** مقادير لقيمات القرع :
~~~~~~~~~~~~~~~

2 - قلاص طحين
2 - روب
1- قلاص قرع مفيوح و مهروس
1- ملعقة كبيره خميرة
4 ملاعق كبيره نشا
ماء كافي للعجن

** ملاحظة :
~~~~~~~~

لا تصير العجينه لينه حيييل و رخوه و لا تصير ثقيله حيييل حسب الماي اللي ينحط .










السبت، 14 أغسطس 2010

رمضان و الريجيم بتاعي




يا زين الهمه و الاراده و الشطه من افكر بالريجيم و الهدف اللي بحققه
من وراه لا و مو بس افكر ، نوو نووو لما اطبق و اتحدى و اعاند
و اركض ع الجمعيه ابتدي اشتري متطلبات الريجيم عشان
اعزل عمري عن كل ما لذ و طاب ، حتى الطلعات و المطاعم
احرم روحي منهم عشان سبحان الله ما اخرب اللي
ابتديته وماكو الا شهرين بالكثير و اخرب الاولي و التالي :"(

بعد فتره ارد و رادتي اقووووى و اتحدى و اروح دكتور تغذيه و ريجيم
و اتسنع و التزم ، ليش ؟؟ لان وراي احد يراقبني و ما احب افتشل مره ثانيه
عاد اهنيه شحليلاتي اسم الله علي التزام و نشاط و همه بس بعد جم شهر اتعقد
واعقد الدكتور معاي لما يقعد يبحلق بالميزان و الاوراق اللي بيده @@ يسألني :

الدكتور : انتي بتخربطي يا قلب طفله ؟؟؟؟؟

انا : لاااااا و الله كلش ما خربطت و ملتزمه عدل :(

اكيد ما نزلت شي صح ؟؟ << احس روحي فقيره و متهمه لوول

الدكتور : انتي متاكده ؟؟ متكليش حاقه كده و لا كده

انا : لااااا و الله العظيم و ادخل امي او اختي شهود على كلامي عاد حسب من اكون ماخذته

الدكتور : يضحك طيب ايه المشكله اللي عندك عملتي لي التحاليل اللي طلبتها ؟؟

انا : مع تتنيحه و ابتسامة لا نسيت (( هو بالحقيقه خوف من التحاليل و الابر ))

و الزبده بعد هذا كله ما انزل الا جرامات و يحوشني احبااااط و اطنش
مواعيدي و اقطع الريجيم و هكذا ما خليت طبيب ريجيم ما طليت بالفيس مال هوه :"(
و نفس المشكله فقلت خلاص (( طنش تعش تنتعش ))
بس من شهر تقريبا تحديت مرت اخوي و اختي اني بضعف و بوصل للي ابيه
و بفاجئهم بالعيد طبعا كلهم قالوا كالعاده ما بتسوين و لا ما بتكملين ،
احم احم عصبت وقلت بتشوفون مع تذكيرهم لي بقرب رمضان
و المغريات اللي فيه و الغبقات و الطلعات والزوارات @@
ما اهتميت و قلت عااااااااادي اتكلت على الله و ركبت سيارتي و اخذت ماماتي
معاي و شديت الرحال لدكتور ريجيم نيووو لاني بفتح صفحه جديده طبعا الكل
يمدحه و شفت حريم تبارك الرحمن متاااااااااااااااااااااااااااان ضعفوا
ماشاء الله ربي يتمم عليهم ..
فتحت ملف و اشتركت لمدة سنه اسبوعيا لازم اروح له :)
صرت قويه و بديت و مرت اخوي و اختي و ماماتي يأزروني بصراحه البيت كله ههههههه
و نزلت كيلوين بس احسن من اول و بين ع ملابسي :)

الحين مو اهني المشكله ، البروبلم بأول يوم رمضان خربطت و ثاني يوم
خربطت و ثالث يوم خربطت الخوف يصير طول رمضان
خربوطيشن بالاكل و يروح الريجيم :"(

عاد اليوم رابع رمضان و ان شاء الله بحط شريط لاصق على حلجي
و بنعزل بفطوري عنهم و ارادتي بتصير اقوى و بوصل لهدفي بإذن الله ^_^


دعواتكم لمنكوبين الوزن الزائد و محبين الرشاقه بالشهر الكريم :)



الأربعاء، 11 أغسطس 2010

عساكم من عوادهـ



اَللّهُمَّ اجْعَلْ صِيامنا في رَمَضَان صِيامَ الصائِمينَ،

وَقِيامنا فيهِ قِيامَ القائِمينَ، ونَبِّهْنا


فيهِ عَنْ نَوْمَةِ الْغافِلينَ، اَللّهُمَّ قَرِّبْنا فيهِ

إلى مَرْضاتِكَ وَجَنّبْنا سَخَطِكَ وَنقِمتِكَ،

وَوَفِّقْنا فيهِ لِقِرآءةِ آياتِكَ


اَللّهُمَّ واجْعَل لنا نَصيباً مِنْ كُلِّ خَيْرٍ تُنْزِلُ

فيهِ،بِجُودكَ يا اَجْوَدَ اْلأَجْوَدينَ وأذِقْنا فيهِ

حَلاوَةَ ذِكْرِكَ، وأَِدآءِ شُكْرِكَ

وَاحْفَظْنا فيهِ بِحِفْظِكَ يا أرْحَمَ الرّاحِمينَ