الخميس، 30 ديسمبر 2010

فراقها الابدي




رحلت حصه



رحلت اختي الصغيره و حبيبتي



رحلت ملاك البيت و روحه الحلوه



رحلت للابد



رحلت بلا عوده



رحلت لتفقدها اعيننا و تنزف لفراقها قلوبنا



رحلت غاليتي لرب كريم و جنه عرضها السموات و الارض



رحلت و تركت دنيا فانيه و مرض لعين حرمها طفولتها

رحلت لتكون طير من طيور الجنه و شفيعه لوالديها

رحلت و زفت مبتسمه عروس الجنه

اللهم ارحم حبيبتي و اسكنها فسيح جناتك

اللهم اجعلها فرطا و ذخرا لوالديها و شفيعتا مجابه

اللهم ثقل بها موازينهما و اعظم بها اجورهما

و الحقها بصالح المؤمنين و اجعلها في

كفالة إبراهيم و قها برحمتك من عذاب الجحيم

اللهم صبر قلوبنا و اجبر مصابنا و اجمعنا بها في جنتك يا رحيم


الأحد، 21 نوفمبر 2010

البحر عالم جميل ~


اوقف هنا اطالع بعيد

ع مد النظر بحرا عنيد

موجا حلف ما يهدى ابد

طيرا يهاجر في موسم جديد

ابقى انا متمركزه في موقعي

متسنده ع حلمي الوليد

ابحر بـ روحي للبعيد

و اوصل لارض بعالم فريد

تلحفها سما حب

يكسيها الوفاء ورد

تمطر غيومها صدق

يغرس اهلها اخلاص

يعكس بالعيون امن

و يثمر بالقلوب امان

اصحى ع نسمة هوا بريحة بحر

و رفرفة طير رده حنين

ابقى انا و يبقى البحر و يبقى مكاني للابد

ابحر بـ روحي للبعيد

و اغفي بعيني عن ليلا طويل



الثلاثاء، 16 نوفمبر 2010

كل عام و انتم بخير و سعاده ~


السبت، 6 نوفمبر 2010

مش عايزة تتجوز :)




فتحت سين راديو السيارة على اذاعة المارينا اف ام



و هي متجهه مع صديقتها المقربه نون لـ 360 مول



ليأتيهم صوت نوال الكويتية :



" ابي صوتا يعبر عن شعوري



و ابي قلبي يحس بيوم راحه



و ابي اعرف مكاني اوين دوري



و ابي اعلن محبتنا بصراحه



و اقول للعالم احبك احبك انا احبك



يسعدلي مسا هالحب و يسعد لي صباااحه "



مدت يدها لراديو و قامت برفع صوته ~



نون : الله يا حلاة هالاغنيه احسها تتكلم عني لما اسمعها ودي



اصرخ احبك انا احبك ههههههه بس ما ادري من احب ?!?



سين : ههههههه الحمدلله و الشكر من تحبين يا حسره



تحبين نفسج اقول يمكن اهلج ربعج أي بس غيره لا صويحبتي



و اعرفج مو مالت حب الله يكملج بعقلج .



نون : هاا سين اللي تحب بنظرج ناقصة عقل يعني ؟؟



سين : لا مو قصدي بس بذمتج في حب حقيقي بهالوقت



كل من قال احب و حبيبي و حبيبتي و اهمه ما يدرون



ان الحب مو كلام مو شعارات مو لعب فهمتيني يعني



انتي ارقى من حب اليومين دووول يا عسل : )



نون : بعد عمري انتي يا اشطه بس هم للحين بالدنيا حب



راقي حب نظيف شريف لكن قليييييل و الطيبين ربج ايطيحهم



ابعض و ايجمعهم على خير مثلج انتي و ريلج ربي يتمم لكم على خير .



سين : نون يا عمري عمرج انتي لمتى بتمين على هالحال



مضربه عن الزواج و صاكه بابج بويه الخطاطيب لو



ما اعرفج قلت معقده و لا مينونه و لا شيفه



و انتي اروع شخص عرفته بحياتي من كل النواحي ؟؟!!



نون : بس جذي كيفي مزاجي تقدرين تقولين



اممممم معقده مينونه خبله أي شي يعجبج مع انج تعرفين



اني سمجه و بحري امي و ابوي الله يخليهم لي مابي غيرهم :)



سين : جب بس جب امج و ابوج شلعتي قلبهم



حرام عليج يبون سعادتج و انتي عوووبه ما تفهمين ؟؟



نون : لاني احبببببببببهم يا عروسه



سين : واااااااي امحق حب ياربي عليج كل رفيجاتنا تزوجوا



ربي يوفقهم و انا اجهز معاج لعرسي اللي



ما بقى عليه شي شتنطرين اكبر من هالكبر ؟؟؟



نون : انطر اييني الفارس اللي يخطفني



على حصان بنفسجي عور و اعرج :)~



سين : انتي ما تفهمين ماتدرين ان الناس و المجتمع الغبي



ينظر لج انج عانس و مسكينه محد يبيج و لا معبرج و لا انطق



بابكم مع ان مو ناقصج شي و كل من يبيج و ينطرج و انتي



ادرى بس راسج يابس امانه ما يحرج هالشي ..



نون : ههههههههههههههه قلتيها مجتمع غبي اشعليهم مني عانس



و لا متزوجه امبيه قاعده على قلب احد انااااا الحمدلله و الشكر ع العقل .



سين : نون يا عمري انتي اختي و حبيبتي و ابي لج الخير .



نون : اووووووووووص ادري ادري ادري .



سين : بقولج شي حررررررررني يمكن يحرج و يخليج تفكرين عدل ,



تذكرين قبل يومين لما قلت لج بروح بيت عمي و بتغدى عندهم ؟



نون : يب



سين : سلمج الله على الغدا و احنا نسولف انا و بنات عمي



عن تجهيزي و شنو بقى علي و شنو خلصت و ان محد يروح



معاي و مستحملني و مفضي نفسه لي غير حبيبتي و اخيتي نون ..



و الا مرت عمي تقعد تدعي لج ..



مرت عم سين : ربي يعطيعها العافيه و يكبر حظها و يرزقها



بابن الحلال اللي يسعدها والله معوره قلبي كل هالزين و السنع



و لا عرست اشفيهم شباب هالوقت انعموا و لا انعموا ؟؟؟!!!!



و الا ينط عمي بالسالفه



عم سين : مو نون بنت بو فلان الفلاني ؟؟



سين : أي اهيه عمي بعد قلبي قلبها



عم سين : و الله ونعم البنت و الابو و الاهل ليش يا يبه ما عرست



للحين تبيني اكلم عنها جم واحد اعرفهم خوش رياييل و يبون بنات الحلال



سين : @@ شكووووووووو لا عمي الله يطول بعمرك ليييييييييييش



تكلم و ادلي عليها الناس ترا نون اسم الله عليها مو بايره



و لا طايحه بجبد اهلها اهي اللي ما تبي العرس ورافضه



و لا كل من ياها وطق بابها من اكبرها واسمنها و يبون موافقتها



عم سين : يا يبه حرام عمرها يروح و اهي جذي شبيقولون عنها الناس .



مرت عم سين : لا يا يمه حرام عمرها وشبابها كلميها يا عزتي لامها .



سين : امبيه اشفيكم ترا و الله البنيه مستانسه و سعيده ما تبي



الا حياتها بين امها وابوها ورضاهم و مجابلهم هذا اللي يريحها احنا ما لنا



شغل بحياتها اكيد ابي لها السعاده بس ربي يهديها ويسعدها باللي تختاره .



نون : أي بعد غردي غردي



سين : شغرد شغني شصارخ واااااي بعد تبين ازود من جذي ؟؟؟



نون : لا ماااااااابي و لااااااااشي من هالناس اهمه اللي شيبون فيني .



لا بجيت و لا شققت اهدومي ولا شكيت الحال و قلت زوجوني



و لا عايزه اتجوز و لا تحجيت باحد و لا حسدت احد و لا لي شغل بغيري



ليش عندنا الناس حشريين و يدخلون نفسهم بمواضيع كلش ابد ما تخصهم .



لو بتقولين لي كل يوم سالفه ادري ما بيسكتون بيدورون غيرها



يعني لتزوجت قالوا ما حملت و لا طولت و لا زعلت مع الريل



قالوا تهاوشوا اهي عوبه و لا اهو فيه مصيبه بيقولون تطلقت



بيقولون و بيقولون و بيقولون ما بيسكتون حتى عن الميت



يسولفون بموته و ليش وشحقه وااااااي مجتمع اييب المرض اوووووووف .





سين : انا اسفه ياعمري بس و الله ابي مصلحتج



و اموت قهر لاحد نظر لج نظرة شفقه :(



نون : هههههههه انزين شحقه قلبتيها فلم مصري شفقه و لا شفيقه



سين : واي يا ملغج تحرين .



نون : زيدي علي ملح هههههه يا بنيه من صغري ما يهموني الناس



دام انا راضيه ربي ثم اهلي و مو مسويه شي غلط طززززز بالناس و حجيهم :)



سين : على فكره طز يعني ملح هههههههه.



نون : أي يعني انا كلي ملح صبري صبري عندي اغنيه بفوني



بتعجبج سكري الراديو و سمعيها :)



تلفون نون :





(( شويخ من ارض مكناس وسط الاسواق ايغني







اشعلي انا من الناس و اشعلى الناس مني ))








الاثنين، 4 أكتوبر 2010

اليوم العالمي للمعلم ~




كلنا نتاج المعلم ،، فالمعلم شمعه لا تنطفئ ~~


احب هذا اليوم منذ كنت في مراحل الدراسه المختلفه
احبه لانه يوم نحتفل فيه جميعا بمعلماتنا الغاليات
منذ بداية طابور الصباح و حتى اخر اليوم ~

لاني في هذا اليوم استطيع ان اهدي معلمتي ما اريد
و اقول لها شكرا من القلب لكل ما تبذلينه من اجلنا
ليس في هذا اليوم فقط
فكل يوم تستحق منا الحب و التقدير و الشكر
و لكن في هذا اليوم المميز المحدد و المعنون
باسم المعلم و المعلمه يتألق الشكر و الثناء بحقهم

كنت اعرف ان معلماتي من مرحلة رياض الاطفال و الى الثانوية
يتعبن من اجلنا و يبذلن جهودا كبيره كانت من اعمارهن
و صحتهن و بيوتهن لينجزن اعمالهن و ينقشن العلم
في عقولنا و الحب في قلوبنا لهن و لدراسة ~

و الان بعدما اصحبت معلمه تحب طالباتها و تهتم لامرهن
و تقوم ما بوسعها لمساعدتهن ~

علمت و قدرت اكثر و اكثر من قبل
مدى ما عانيتن من اجلنا لتخرجوا
اجيال و اجيال تذكركن بالخير
و تدعوا لكم بالسعاده بالدنيا والاخره


شكرا معلماتي ~ فأنا احبكم ~

الثلاثاء، 14 سبتمبر 2010

عام دراسي جديد ~




كل عام و جميع المعلمين و المعلمات بخير و صحه و سعاده

<<< و لو اني اشك في ذلك :Pp~

ان شاء الله يارب يكون عام دراسي مليء بالجد و الاجتهاد و الانجازات ^_^


الاثنين، 13 سبتمبر 2010

ذكريات العيد ~




باركوا ياحباب الفرح لذ و طاب ~ اليوم يوم العيد والعيد نغني نشيد

ردوووا علي يا احباب ردوووا علي يا احباب ~ تررن تررنتن تررن تررته

<< بصوت عوض دوخي الله يرحمه على اذاعة الكويت اف ام

الساعه 3 في اول يوم العيد و انا متجهه بسيارتي مع خواتي

الحلوين لصالون لزوم التزهب للجمعة الكبيره ثاني يوم العيد

في بيت العز يا بيتنا ~ طبعا كل وحده تنعس بصوب من الفيئه بكييير

الا صوت قلب طفله تغني مع الراديو اغاني العيد :)


عاد ابتدت ذكرياتي و سوالفي لخواتي مع كل اغنيه بحكم

اني الكبيره و العيوز لووول و ايام جمعتنا في البيت

العود و طفولتنا الحلوووه

مع كل صلاة عيد و ريوق

العيد تزورني احلى الذكريات بيوم

العيد

و سنين الطفوله

تجهيز ملابس العيد و الجنطه لي

و

البواكه

لاخواني من الليل و السبوح و استشوار

الشعر

و اللفافات

كما كنا نسيمها لووول و الشبابيص .

البيت كله ينام مبجر لصلاة العيد و نتسابق لسرايرنا

عشان منو يكون الاول يعايد على امه و ابوه

و ابوه العود و امه العوده و العمات و العمان

و بعدها

نتجه لبيت امنا العوده 2 و ابونا العود 2

و الخوال و الخالات .

طبعا بالفراش نتقلب يمين ويسار نتخيل شكلنا

باجر و جم بنحصل اوين بنروح :)

لسمعنا صوت التكبير انط واقفين من الفراش

<<< و الله لو المدرسه ينهد حيل اميمتي ما قمنا لووول

نلبس و نتزكرت و ننزل ننطر اهلنا يوصلون من الصلاة

عقبها نتريق و نشغل التلفزيون و نسمع اغاني هالعيد و

نغني معاهم عاد الله لا يسمعكم النشاز و تقلب الكلمات

على كيف كيفنا لووووول


(( عيدي يا كويت يا احلى بلد انا لج غنيت

بروح و جسد ~ بصوت رويشد ))

تذكرت ايام ساحة المدرسه عقب العيد تشتغل

هالاغنيه و سوالفنا شسويتوا بالعيد و جم حصلتوا

عيادي وين رحتوا أي مسرحيه وووووو ..


(( العيد هل هلاله كل الفرح يحلاله ياربنا

زيد النعال

حسن جميع الحاله ~ لمحمود الكويتي الله يرحمه ))

لوووووووووول طبعا هالاغنيه عقب ما كبرت شويه

و استوعبت نقدت على عمري و ضحكة ضحك اشوف

الكل يضحك علي لغنيتها و يقنعني اني غلط بس

العناااااد يخيلي اني انا الصح و اسمع عدل و

المصيبه اعدل لليهال اللي معاي بس

بعررررررف شكو قلبتها و حطيت النعال عزكم الله !!!!!!


(( يا مرحبا بهالعيد يا محلى ايامه عسى علينا ايعيد

و نحمر

ايامه

اصبيانا يرقصون و ابنيتنا يلعبون ~ غريد الشاطئ الله يرحمه ))

اهنيه بعد ما ادري ليش خليتها نحمر ايامه يمكن من

كثر حبي و انا صغيره للحمره اللي نتشفقها بالاعياد

و المناسبات لما امي تمسحها مسح على شفايفي

و تقولي بس عيب هذا كافي اتصنم

ما اشرب و لا اكل شي عشان ما تروح @@

عاد اعتقد من جذي طلعت البدليه لووووول


(( باجر العيد و نذبح بقره خلك بعيد و لا يجي الهلا @@ ))

هالاغنيه نغنيها بالليل قبل العيد انا و الحلوين اللي

معاي من بنات و صبيان مع صفقه ههههه انزين

دام باجر العيد ليش خليتها خلك بعيد يبا عيد الكل

بيقرب و يستانس لووووول و لا يجي الهلا شنو

يعني لا يجي الهلا حده لا تعلييييييييق هههههههه

و من زود السناعه و الدكتاتوريه افرض رايي عليهم

و اعلمهم الكلمات مقلبه و اصر و لا ما اخليهم

يغنون و اشوش عليهم لوووووووول


ضحكت و اضحكوا على سوالفي و صحصحوا و خلصنا

مشوارنا و عيدنا و استانسنا و عدت ايام العيد بسرعه

و حسينا بفقدنا لحبايب لنا مكانهم فاضي جاوروا

رب العالمين ربي يرحم امواتنا يارب و يغفر لهم

و يحفظ احبابنا و يطول بعمرهم


صج الحين لما كبرت عرفت معناة كلمة امي العوده

الله يرحمها لما كنا نراكض لسوق و نحوس للعيد اتقول

~(( العيد مو بلبس الجديد العيد لمن عادت عليه

الليالي و هو مرضي ربه و قاضي فرضه ))~


عساكم من عواده و تقبل الله طاعتكم ~

الجمعة، 10 سبتمبر 2010

تقبل الله طاعتكم ~



الاثنين، 16 أغسطس 2010

لقيمات القرع من صنع ايديا :)


احم احم لقيمات من صنع ايديني شي مو غريب
بما اني من سنتين و انا ابي اريح الغاليه امي كنت اخليها
تسوي العجين و اصب اللقيمات عنها
شعور يهبل لما يطلعون مدورين حلوين سليمين من
الاعاقه و من غير قرون او ايدين و اريول :)
استانس اطلع ابشر البيت كله انا سويتهم لووول
و لكن الصج الصج ما كنت اعرف مقادير العجينه بس
حبيت اتعلم هالسنه فما سالت امي لاني ابي افاجئها
سالت حبيبتي و الغاليه على قلبي رفيجتي قالت لي بعطيج
طريقة لقيمات يديده بالقرع @@ انا بصراحه انصدمت
شكووو القرع ابي مقادير لقيمات يا حلوه مو مرقة !!
المهم اقنعتني انها تهبل و طعمها مميز
و اطلع فيها جدام ماماتي هههههههه
قمت مبجر و تسحبت للمطبخ قبل امي و عجنتها و كاهي الصوره



بعدين عقب ما خمرت و صار وقت اني اصبهم صورتهم
و اهمه يسبحون بالزيت :)


و اهني عقب ما خلصتهم و شيرتهم رحت اركض بالصينيه من مكان لمكان
و امي تناديني ياربي ما انلام انجاز سويتهم من الالف ليما الياء لوووووول


و اهني الصوره اقرب و الاهم ان طعمهم حلووو
ما قصرت صاحبة الوصفه ^_*



** مقادير لقيمات القرع :
~~~~~~~~~~~~~~~

2 - قلاص طحين
2 - روب
1- قلاص قرع مفيوح و مهروس
1- ملعقة كبيره خميرة
4 ملاعق كبيره نشا
ماء كافي للعجن

** ملاحظة :
~~~~~~~~

لا تصير العجينه لينه حيييل و رخوه و لا تصير ثقيله حيييل حسب الماي اللي ينحط .










السبت، 14 أغسطس 2010

رمضان و الريجيم بتاعي




يا زين الهمه و الاراده و الشطه من افكر بالريجيم و الهدف اللي بحققه
من وراه لا و مو بس افكر ، نوو نووو لما اطبق و اتحدى و اعاند
و اركض ع الجمعيه ابتدي اشتري متطلبات الريجيم عشان
اعزل عمري عن كل ما لذ و طاب ، حتى الطلعات و المطاعم
احرم روحي منهم عشان سبحان الله ما اخرب اللي
ابتديته وماكو الا شهرين بالكثير و اخرب الاولي و التالي :"(

بعد فتره ارد و رادتي اقووووى و اتحدى و اروح دكتور تغذيه و ريجيم
و اتسنع و التزم ، ليش ؟؟ لان وراي احد يراقبني و ما احب افتشل مره ثانيه
عاد اهنيه شحليلاتي اسم الله علي التزام و نشاط و همه بس بعد جم شهر اتعقد
واعقد الدكتور معاي لما يقعد يبحلق بالميزان و الاوراق اللي بيده @@ يسألني :

الدكتور : انتي بتخربطي يا قلب طفله ؟؟؟؟؟

انا : لاااااا و الله كلش ما خربطت و ملتزمه عدل :(

اكيد ما نزلت شي صح ؟؟ << احس روحي فقيره و متهمه لوول

الدكتور : انتي متاكده ؟؟ متكليش حاقه كده و لا كده

انا : لااااا و الله العظيم و ادخل امي او اختي شهود على كلامي عاد حسب من اكون ماخذته

الدكتور : يضحك طيب ايه المشكله اللي عندك عملتي لي التحاليل اللي طلبتها ؟؟

انا : مع تتنيحه و ابتسامة لا نسيت (( هو بالحقيقه خوف من التحاليل و الابر ))

و الزبده بعد هذا كله ما انزل الا جرامات و يحوشني احبااااط و اطنش
مواعيدي و اقطع الريجيم و هكذا ما خليت طبيب ريجيم ما طليت بالفيس مال هوه :"(
و نفس المشكله فقلت خلاص (( طنش تعش تنتعش ))
بس من شهر تقريبا تحديت مرت اخوي و اختي اني بضعف و بوصل للي ابيه
و بفاجئهم بالعيد طبعا كلهم قالوا كالعاده ما بتسوين و لا ما بتكملين ،
احم احم عصبت وقلت بتشوفون مع تذكيرهم لي بقرب رمضان
و المغريات اللي فيه و الغبقات و الطلعات والزوارات @@
ما اهتميت و قلت عااااااااادي اتكلت على الله و ركبت سيارتي و اخذت ماماتي
معاي و شديت الرحال لدكتور ريجيم نيووو لاني بفتح صفحه جديده طبعا الكل
يمدحه و شفت حريم تبارك الرحمن متاااااااااااااااااااااااااااان ضعفوا
ماشاء الله ربي يتمم عليهم ..
فتحت ملف و اشتركت لمدة سنه اسبوعيا لازم اروح له :)
صرت قويه و بديت و مرت اخوي و اختي و ماماتي يأزروني بصراحه البيت كله ههههههه
و نزلت كيلوين بس احسن من اول و بين ع ملابسي :)

الحين مو اهني المشكله ، البروبلم بأول يوم رمضان خربطت و ثاني يوم
خربطت و ثالث يوم خربطت الخوف يصير طول رمضان
خربوطيشن بالاكل و يروح الريجيم :"(

عاد اليوم رابع رمضان و ان شاء الله بحط شريط لاصق على حلجي
و بنعزل بفطوري عنهم و ارادتي بتصير اقوى و بوصل لهدفي بإذن الله ^_^


دعواتكم لمنكوبين الوزن الزائد و محبين الرشاقه بالشهر الكريم :)