هي شابه جميله ، طموحه ، طيبه ، رومانسية ، عامله ،
مدونه و مغرده متميزه بعيون الجميع ..
تقدم لها رجل كبير بالعمر و المركز مثقف طيب ملتزم موهوب
له سمعه كـ المسك بصفات تتمناها اي امراة ..
رأته و جلست معه و اعجبت بشخصيته و اسلوبه في العيش
و التفكير وافقت عليه بمباركة اهلها الذين شجعوها برأيهم
انه (( خوش ريال و كل من يتمناه لبنته )) تمت الخطبه و عقد القران
حددوا يوم الزفاف بعد سنه في هذه الفتره احبته حبا جنونيا
و هو يبادلها هذا الحب بأضعاف مضاعفه هي تستحق هذا الحب
و هو يستحق ثقتها و حبها ..
كانت تقضي يومها و هو منقوش بتفاصيله و هو كذلك يعرف
عنها كل شي و هي ايضا الشي الوحيد الذي لم يعرفه زوجها
و الذي يعتبر السر الوحيد بحياتها حيث لا يعلم به حبيبها
هو انها (( مدونة ببلوقر + مغردة بتويتر )) ليس لشي لم تخبره
و لكن احبت ان تبقى هي دون تغير بعالم التدوين و التغريد اخت للجميع
حيث تكتب ما يدور في بالها و ما تفيض به مخيلتها من قصص
او خواطر او يوميات فأهلها يعلمون بذلك و صديقات مقربات جدا
لم يكن الامر سر فهي عفويه و صريحه و لا تخاف من شي الا الله
كانت تقنعه بضرورة فتح حساب له بتويتر ليتتبع الاخبار و يناقش
في قضايا دائما ما يتكلم عنها و يطرح رايه فيها و يقابل هذا الطلب
بالرفض لانه ما عنده وقت و دايما مشغول ، هي تبيه معاها بتويتر
و لانها ترى فيه الرجل المثقف الراقي اللي وجوده يثري النقاش
و الاراء بتويتر و لكن لا وقت لدي للخربطه بتويتر ففي يوم
كانت تكلمه و هي مسهبه بالحديث معه عن احوال الديره و الاخبار سألها
هو : و الله متابعه الاخبار عدل مو ما عندج وقت للجرايد و التلفزيون
هي : الله يسلم التويتر اللي يلخص كل شي صاير و بالفون بعد .
هو : @@ تويتر ؟؟؟؟؟ ليش انتي عندج اكاونت بتويتر ؟؟؟
هي : بأبتسامه اي نعم عندي اكاونت و مدمنه عليه بعد
و ابي افتح لك اكاونت و تصير معاي .
هو : نـــــــــــــــعـــــــــــــــــــم من متى ؟؟؟؟؟ و ليش ما قلتي لي ؟؟؟؟
ولا انا مو مهم بحياتج ؟؟؟ادري عن كل شي الا تويتر ؟؟؟؟؟
هي : شفيك معصب كنت ابيك تسجل بتويتر و تعرفني
و راح اقولك انه انا فلانه :))))
هو : و من تكلمين بتويتر ؟؟ و شنو تتكلمين عنه ؟؟ و من متى ؟؟
هي : من زمان قبل اعرفك و اكلم الناس اللي اتابعهم
و مرات اكتب لنفسي و اتكلم بأي موضوع ينطرح او انا اطرحه
عادي اللي فيه كلهم محترمين اخوان و خوات في الله .
هو : بعصبيه و لما تكلمينهم من وراي تفكرين فيني ؟؟؟؟؟؟
لما تضحكين معاهم تفكرين فيني ؟؟؟؟؟؟؟
هي : باستغراب انت في قلبي و عقلي و روحي بكل لحظه
و هذيل ناس احترمهم و يحترموني و ما اتكلم معاهم
الا باللي يرضي الله و جدام الكل مو خش و دس و بعدين حتى
اهلي يدرون و ابوي من متابعيني اشفيك الله يهديك ؟؟؟؟
هو : الاكاونت يتكنسل و تنسين شي اسمه تويتر احسن لج و لي .
هي : @@ ليييييييييييييييييييييييش ادخل شوف كل شي كتبته
و قول رايك لو في شي غلط انا سويته لك حق علي .
هو : مابي اشوف و لا اعرف حتى شنو اليوزر نيم مالج سوي اللي قلته وبس
هي : لا مو من صجك تتغشمر حبيبي صح ؟؟
هو: شوفي يا انا يا تويتر اختاري منو الاهم فيهم ؟؟؟؟؟؟؟ و عقب رديلي خبر ؟؟؟
هي : مصدومه لدرجة ما قدرت تقوله بعد اني مدونه من سنين !!!!
حاولت تقنعه بس ماكو فاااااايييييييييده مصر على رايه !!!
القصه صجيه و صارت لوحده صديقتي و اختارت انها تبعد عن التدوين
و التغريد عشان خاطر زوجها اللي تحبه ..
شي يقهر تسلط الرجل لو كان هو المدون و المغرد هل سيتركهم
من اجل حب زوجته و غيرتها عليه ؟؟؟؟؟
و هل التدوين و تويتر عار على البنت انها تشارك فيهم بنظر الرجل ؟؟؟
و هل التدوين و تويتر سبب مشاكل بين الزوجين او خراب الحياة الزوجيه ؟؟؟؟
عايزين نعرف رااااااايكم بهالموضوع بنات و شباب :)
