*__ بساط الريح __*

من منا لا يحلم ببساط سحري يطير به و ياخذه

الي حيث يريد و متى يريد يحمله ليسابق الريح

و يكون بين السماء و الارض كالطيور الحره

المحلقه بغير قيود
قد لا تحلم بالكثير كل ما تتمناه بساط مشابه

(( لبساط الفقر )) المحفوظه حقوقه لسعاد عبدالله

و عبدالحسين عبد الرضا و الدعلتين اللي

داحروهم عليه الصلال و العيدروسي .

ولكن لنا نحن الذين نحلم بهذا البساط الريحي

بعض الشروط على من سيتكرم و يحققه لنا

<< طرارين و يتشرطون

1- يكون بساط ريح من اجود انواع البسط الفاخره

و الثمينه مو مدة حصير من سنة الطبعه .

2- نستلمه من وكالة البسط الريحيه مكيش مدفوع

حسابه و خالص لا اقساط و لا فوائد

<< كيفنا الحلم ابلاش و محد يدري الله يرزق من يشاء

3- ان يتوافر به اذاعة المارينا اف ام & اف ام الكويت

<< خوو منوو يونسنا وقت التحليق غيرهم

4- ان يقدم معه جواز سفر :

كل اللي يحلمون معاي يتسألون ليش جواز سفر

لان ماكو لا مطار و لا هم يحزنون ؟؟!!

بريحهم و اقولهم سبحان الله يمكن حاطين نقاط تفتيش

محد يتوقعها بين كل سحابه و نجمه ؟

فالاحتياط واجب مالنا خلق نتبهذل

و احنا نبي نحلق بعيدا من غير قيود

مختوما عليه بالصفحه الاولى

(( يلا خلنا نروح بين نجمة و قمر يلا خلنا نزور بلدان و بشر ))

<< عشان يكون دليل لحبنا للطبيعه و البشر و ما يحسبونا ارهابين

و مختوما عليه بالصفحه الاخيره

(( خذني بساط الريح وديني لحبابي الله عالم كيف
هالشوق سوى بي خذني فوق السحايب خذني عند

الحبايب اللي ياما وحشوني و قلبي بالحب ذايب ))

<< عشان نراويه كل من تتوقف محطتنا عنده شلون

الشوق سوى فينا و قطنا عندهم يعني نشغل شغل الكلك شوي ..

لحد يزعل و يقول ما نحب الجذب هذا يسمونه جذب ابيض

اذا ما نفع ما يضر مثل بندول المستوصف .

5- يفرض قانون منع تجول و تحليق او تجمع للطيور

الا في وقت معين مثلا من ساعه لساعتين طيران و الباجي لنا

<< شنسوي لا تقعدون تقولون لي هذا تقييد حرية الطويرات

المساكين بقولكم هم احنا مو ناقصين حوادث على الارض

هالدور بالجو مع مناقير و مخالب لا يحوشك!!

6- نتمنى ان يكون لدينا مجلس او منظمه تراعي حقوق

اهل البسط الريحيه و تلبي احتياجاتهم و تأمن لهم حياة كريمه .

تدرون ليش ؟؟

لان كل اللي بيحصلون على هالبساط الريحي العجيب

بينشاتون من على الارض و بيظل طووول عمره يحوس

على هالبساط صيقا / شتاءا / ربيعا / خريفا / ليلا / نهارا

مره فوق جبل و مره فوق شجره و مره فوق بركان

و مره فوق راس ابو الهول يعني عيشتنا

في اعالي الجو فوووف مافي كلمة تحت ابد هذا

اذا ما صارت هالمنظمه اتأجر علينا السطووح

و المرتفعات الطبيعيه و تقطنا على صخر .

تتتتتتتن تتتتتتتتن تتتتتتتتن تتتتتتتتتن تتتتتتتن تتتتن

اوووووووووه صوت المنبه مزعج قعدني

من حلمي اللي ابيه يتحقق ...
شنووو يتحقق ؟؟!!

لا يبا خلاص مابيه يتحقق عقب اخر شرط طلبناه

هونت مابي بساط الريح اقضب القاع احسن لانه عمره

ما راح يكون لاهل البسط الريحيه منظمه تنصفهم

الكل يبي الفايده ..

تتتتتتتتتتتتتتتن تتتتتتتتتتتتتتتتتتتتتتتن تتتتتتتتن

اوووووه راح الوقت و انا افسر لنفسي حلمي المخربط

اروح العصر اشتري لي زوليه سنعه (( بساط ))

و سعرها فيها و بحطها بالصاله و عمري ما راح افكر

فيه انه يطير فيني ابدا …

بس ما اضمن نفسي يمكن باجر ارد احلم

بالبساط و الطيران (( بو طبيع ما يجوز عن طبعه ))

قلم طفولتي غلبه النعاس و شكله فصل عن الخدمه

و بدأ يهذي و يشخبط و يقط خيط و خيط : ))

تصبحون على خير // تمسون على خير