صباحكم / مسائكم ورد و فل و ياسمين
بصراحه فكرة البوست و التساؤل صار في
بالي اكثر من الاول بسبب سالفه صارت
في بيت جيرانا ؟!
بقولكم السالفه و اخرتها بحط لكم تساؤلي
الي ابي منكم اجابه عليه من وجهة نظركم :
السالفه سلمكم ان من 6 شهور توفت جارتنا
((ام جاسم )) الله يرحمها و يرحم جميع اموات
المسلمين كانت مريضه من سنتين و زوجها
(( بوجاسم )) الله يطول بعمره ونعم الزوج المحب
الي مجابلها و ما تخلى عنها بكل لحظات حياتهم .
المهم عندهم عيال و كلهم متزوجين
و مزوجين احفادهم بعد ما شاء الله المهم عقب
وفاة المره بشهرين (( بو جاسم )) قام يحن على
عياله الي معاه في البيت انه يبي يتزوج و ما
تعود على الوحده بعد وفاة شريكة حياته
<< خوش عذر و المره توها ما كملت سنه :(
المهم الشايب عزم على الزواج و عياله انصدموا
ابوهم عود وينه وين الزواج للعلم الله يحفظه
و يطول بعمره يبلغ من العمر ((72سنه ))
بس الي يشوفه ما شاء الله يعطيه بالخمسين .
الشايب ما يبي اي وحده يبي وحده عمرها
ما يتعدى 40سنه يقول ما يبي عجوز لوووول
احتاروا عياله فيه و قاموا يدورون له مره لانه
جننهم و صدمهم قبل جم يوم داق على خطابه
ادور له عروس
<<< تحليلي الشخصي انا اقول المعرس خرف
عاد الله يستر علينا و عليه يدورون له عروس
و منه المال و منها العيال .
خلصت السالفه الي صدمتني و عورة قلبي
و بطلها روبيرت دنيرو سوري بو جاسم :p
التساؤلات الي عندي :
1/ ليش الرجل ينسى العشره و اول ما تموت
زوجته يدور لها بديل و بفترة قصيره ؟؟؟
مو بس بو جاسم كل الي يصير بالمجتمع مثل
هالحاله و ما يكون شايب يكون شاب و عياله
صغار يعني ما يقول بربي عيالي و اخاف
عليهم من مرت الابو و اقعد على
ذكرى ام عيالي !!!
2/ ليش بعض الحريم لما يموت زوجها ما تفكر
الا بعيالها و شلون تربيهم و تقعد طول
عمرها وفيه له ؟؟؟
و السؤال المهم و سبب كتابتي للبوست
و اختياري للعنوان :
3/ ليش المره الكبيره بالسن لما تذبحها الوحده
و يلهون عنها عيالها بحياتهم و مشاغلهم
لما تفكر مجردفكره بالزواج من شخص يعينها
على باقي حياتها و تبوح للفكره لمن حولها
تقوم الدنيا و لا تقعد ؟؟؟
الي يقول انتي خرفتي و الي يقول عيب عليج
انتي عجوز ريلج و القبر و الي يتهمها بالسفه
مع ان هذا حق من حقوقها مو حرام و لا عيب
مثل ما حبيبنا بو جاسم بياخذ حقه ثالث
و مثلث <<< حده بط جبدي .
مع ملاحظة ان ما يكون الزوج صغير بالسن
عشان ما يقولون يضحك عليها و يلهف
ما وراها و دونها نقول رجل بعمرها .
مع ان المعروف و الشايع عندنا ان المره ما
تفكر بشي عقب عين زوجها الا بالستر و
تربية العيال و اذا كانوا كبار تفكر بجمعتهم
حولها و سعادتهم و سعادة عيالهم .
42 التعليقات:
مو حرام على أحد وهذا شرع الله
عادات بايخه
احنا متى بس نتخلى عن العادات السيئه
في عادات حلوه ثنى عليها الاسلام الكرم وصلة الرحم عند العرب
وفي عادات ما لها اي داعي
خلاص انتي شوفيلي عيوز وانا اتزوجها لووووووول
ببساطة الريال يقدر يتزوج حتى وهو فوق 60 ، بس المرة ما تقدر تتزوج حدها تحت 45، عاد انا ما أقدر أوضح أكثر، مري عمتي بعد صلاة العصر واهي تشرحلج :P
حبيبتي في ظروف تحكم الشخص ..
وايد حريم يتزوجون وعادي وهم في وايد ريايييل عقب حريمهم جابلوا عيالهم ولا تزوجوا ..
شخصيا أعرف وايد رياييل توفوا حريمهم وللحين كاهم مجابلين عيالهم ..
وللعلم واحد منهم توفت مرته وعمر اكبر وحده من عياله 14 سنه وغيرها عنده 3 بنات وولد بعد ..
تخيلي زوجهم كلهم وكاهو للحين قاعد مجابلهم ومجابل احفاده ولا يفكر بالزواج مع ان عياله اهم نفسهم الي يحنون عليه يبون يزوجونه ومع هذا كل ما افتحوا معاه الموضوع يقولهم اذا لقيتوا وحده نسخه من امكم بكل شي ذيك الساع افكر بالزواج :)
وغيره وايد وهم في حريم مايصدقون تخلص العده عشان تطقها زواج وماهمها شي ..
الشغله كلها مرتبطه بالشخص نفسه صدقيني .. ;*
وترى هم عمت الي كاتب كومنت فوقي عدل كلامها أقصد عدل شرحها لووول
يعطيج العافيه حبوبه على الموضوع ..
تقبلي مروري ..
kuwait
مرحبا
بصراحة اوافقج الراي ان الوحدة اذا تبي تتزوج بالحالة اللي تكلمتي عنها يسوون لها سالفة .. مدام مو مسوية شي غلط المفروض يكون شي عادي عند الناس
و مشكورة و تقبلي مروري الاول :)
اتمنى ان كل العيايز و الشياب يتزوجون
الكبير بالسن يحتاج رعاية عاطفية
اكثر من الرعاية الصحية
المرأة عندما ترمل تهتم بصغارها للهروب من الحزن , و هذه نعمة
من الله و من اسرار الامومة و فوائدها
الله انعم على المرأة بالانشغال بالصغار
كما انعم الله على الرجل بأمور اخرى
==
اتمنى لو ان تقوم جهة معينة بتزويج
و تنظيم لقاءات تعارف بين الارامل
و كبار السن
مانتوفاني
خوش عذر و المره توها ما كملت سنه
إذا 3 سنين عادي عندج؟
1- من قالج ان الرجل نسى العشرة الرجل قادر على الزواج وحاب ان احد يراعي ومايبي يخربط.
2- اصابع ايدج مو سوه...خالي طلق مرته وربا عياله وشغلهم وطليقته اول ما طلقها تزوجت وهو بعد 10 تزوج اهلي ازعلو عليه, الحريم يفكرون بالزواج بس بعض الأحيان يمنعم الحياء, وفي الله المستعان تقول انا جربت الزواج والحين انا ملك نفسي.
3- تقوم الدنيا وتقعد لجهل هالناس, المرأه من حقها تتزوج وهذا اصلح واعف لها, شوفي الصحابيات ما يقعدون إذا مات الرجل تزوجو ومحد انكر عليهم, بس للأسف الأمور تغيرت علي العرف اللي احنا فيه الحين.
وسلامتج
لاتقوليلي محتره لأن بو جاسم ماخطبج
P:
يا مساء الخيرات
وكل انواع الفل
يا حلو الموضوع اليوم
انا بقول جملة وحدة بس
علشان اختصر ما يكتب عن الرجل والمرأة
حول العالم
فسيولوجية الرجل تختلف عن المرأة شئنا ام ابينا, ما راح يتغير
بس هذا ما يمنع ان الرجل يحس
وله احتياجات
طبعا يحس لما يبي يحس
ويحتاج الي بيه ودايما عندة العذر
تقبلي تحياتي امورة
:)
والله يرحم موتانا وموتاكم
الوحده فعلا قاتله
يبا حلال عليكم اخذوا راحتكم
بس مجتمعاتنا المحافظه مرات تكون لها نظره بامور وايد غلط
عندي مثال
الزوجه تدري عن زوجها يكلم وحده مو مشكله عادي تنبلع
لكن ان درت انه تزوج عليها ويه
يروح فيها
فيه اسئله انتي سألتيها لما اطوف ال71 راح اجاوب
الله يعطيك ويعطينا طولة العمر
قولي امين
على الرياايل اتوقع لانه ما يقدر يعتمد على نفسه و يبي احد يكون معا
بس المرة لي صار فيها نفس الموقف تقدر تعتمد على نفسها و تشيل عمرها
غير هذا انه الريال الي يخون العشرة و يبي يتزوج
انسان ما يهمه غير نفسه و اناااني
و بط جبدييي
لوول اهم شي اني عصبت
و على الناس الي تقوم الدنيه على المرة لي بغت تزوج ناس ماعندها سالفه
تصدقين عندنا وحده بالعايلة جذي
امبي انسانه تينن اخلاق و جميله و ريلها توفه من فتره قصيرة عقب زواجها
تخيلي لمة سالت عمتي عما ما تزوحت؟؟
تقولي استحي شنو تزوج عيب خل تقعد تربي عيالها
يعني ليش التخلف؟؟
البنت للحينها صغيره شنو المانع انها تزوج؟؟؟
جد انقهرت
بس مشكورة على الموضوع
استانست على بلوقج شكلي بسير علي مرة ثانيه لول
salamz sweetee....
yoyo
اهليين اخوي ^_^
اي الكل يدري ويعرف انها مو حرام
بس شتسوي بالعقل لا تحجر على العيوز
صدقت العادات الحلوه قامت تتلاشى و
يحل محلها المصلحه اللي تحلل و تحرم .
و من ناحية العيوز اللي تبيها افاا
عليك بدور لك بس بسألها عن شروطها و
جم تبي مهر و عقب ارد لك خبر
لووووووول
اسعدني مرورك :)
Blog 3amty
هلا بالعمه و بلوقها ^_^
وضحت الرؤيه و بمر عمتك ان شاء
الله اتقرض حب ويها :P
بس العمر ماهو معيار لزواج كبار السن و سالفة بوجاسم اكبر مثال
يعني بذمتك اللي عمره ستين نفس اللي عمره 30 شي اكيد لا و بعض الحريم يتعدون هالعمر اللي حطيته و تبارك الرحمن جنهم اصغر المسأله شعور بالوحده يعني الريال يحس و المره لا ؟!
شي يقهر بصراحه و هالحجي للعيايز
انا ادافع عنهم ترااا :)
نورت يا مستأجر بلوق العمه ^_*
Kuwait
هلااا بالغاليه ^_^
حبيبتي هم انا اعرف رياييل ما فكروا بالزواج عشان عيالهم يا قلبي عليهم هذووول نادرين صدقيني مثل الحريم اللي ينطرون العده تخلص عشان تشوف نفسها
و بالطقاق العيال يعني هذول شواذ بالنسبه للعامه .
انزين شحقه تأيدين حجي العمه بالعمر ليش ترا كلهم واحد الشايب و العيوز تعدوا عمر الشباب و فقدوا ميزاتهم اذا فكروا بالزواج عشان ما يشعرون بالوحده لا تحطون العمر عائق للعيوز الفقيره :(
و يعافيج غلاتي مرورج يسعدني :)
secret
مرحبتين اخوي ^_^
تسلم انت وافقت الشي اللي لا ينافي
لا عقل و لا دين يعني الحق المشروع
لهلفئه من الحريم :)
سيكرت ممكن تنضم معاي للدفاع عنهم :P
العفو نورتني بمرورك و ان شاء
الله ما يكون الاخير :)
mantovani
هلا فيك اخوي ^_^
و الله كلامك درر بس هم المره لو
انشغلت بعيالها و بارتهم تحتاج لشخص يوقف معاها و يساندها بهالحياة مع هذا تحرم عمرها من كل شي عشانهم و ماضنتي هالميزه عند اغلب الرياييل و يسون اللي اهي تسويه .
و بعدين تمنيك لجهه تنظم تعارف و تزوج كبار السن لو تمت عندنا اعتقد المجتمع بيقلب الدنيا عليهم و عيالهم اول من بيحكم عليهم بالخرف اذ مو الجنون .
نورت اخوي
2cool2care
هلا و مرحبا ^_^
(( إذا 3 سنين عادي عندج؟ ))
يا خوي مو سالفة 3 سنين ولا عشر الواحد يحترم سنين العشره اللي بينهم مشاعر عياله و حزنهم مهما كان ع
الاقل سنه و عقبها يتزوج لانه من
حقه و لا احد ينكره عليه هالشي يحز بالنفس ترا لو ما قالوا له.
اللي نفس خالك قليل بس الغالبيه العظمى يا الله نفسي و بوقت قصير يعني انا ناقده على بوجاسم لانه عقب 6 شهور في بعضهم عقب شهر شهرين شنووو هالقلب :(
صاااج محد ينكر عليهم لان زواجهم يرضي الله و رسوله بس الحين لا ما يرضي العيال او العايله عيب عقب ريلج ماكو زواج قمة التخلف شتقول بعد :(
شكووو احتر الله يخلف عليه اكبر من
ابوي العود لو محاجيني بس جان
قلت له انطر شوي و انا اللي
بزوجك :P
و الله يسلمك و يعافيك :)
نورت
ManalQ8
اهليين و سهلييين اختي ^_^
مساء و صباح السعاده عليج
حلت دنياج يارب
اهو من ناحية انهم يختلفون فسيولوجيا فهم يختلفون بس من ناحية المشاعر و الاحاسيس احسهم واحد اثنينهم يشعرون بالوحده و اثنينهم يحتاجون لشريك بالحياة .
يعني مو من حق احد يحلل عليهم شي
و يحرمه .
امين الله يرحم جميع اموات المسلمين
اسعدني تواجدج ويارب
ما يكون الاخير :)
Barrak
هلا و غلا بوعبدالله ^_^
اي و الله قاتله الله يعين كل وحيد
في هالدنيا.
يعني سمحت لهم ياخذون راحتهم ما
تقصر الله يطول بعمرك لوووول
اي و الله صاج نظرات مو نظره غلط بغلط
بس المثال اللي حطيته من البدايه المفروض يروح فيها مو لطاح الفاس براس شي غريب اللي يصير :(
اميييييييين الله يطول اعمارنا على طاعة الله و رضاه :)
نورت ياخوي
5roofa
يا مرحبااا ابله خروفا ^_^
اي اصلا حده بطت جبد و شي يقهررر
لما يحرمونه على الحريم و يحللونه
على روحهم:(
شفتي مثل هالمره اللي قلتي عنها بعد قلبي مسكينه الله يعينها انظلمت و السبه اللي حولها و اكبر دليل رد عمتج عليج ما تدرين لو اهي تفكر بالزواج و خايفه من ردت فعل اللي حواليها
اهو تخلف و بس الا جوووووور :@
العفووو حبيبتي
و انا اسعدني مرورج و حياج
الله مره ثانيه و ثالثه و الي ماله نهايه البلوق بلوقج :)
تدرين انا افكر بهذي السالفه بعد ..
بس احيانا شنو اقول !!
ليه المره الكبيره تبي ريل ويعور قلبها وتخدمه بعد هذا العمر مو خبرج الزوجه الصالحه الي تسهر على راحه زوجها
وتلقينه شافت الويل من ريلها الاول وتبي ترتاح وتطلع وتروح وترد على كيف كيفها
محد يراقبها .. لو تاخذ واحد يقعد يجابلها ويعور قلبها ويحن على راسها
تحليلي الشخصي ...
اما الريل هو المستانس الوحيد بسالفه الزواج لانه المره هي الي تريحيه وتطبخ له وتونسه ..
وهذي كلها من تربيه الرجال للحريم و تعودينه على هذي الامور
واذا الوحده تبي ريل ليش لاا مو عيب ولاحرام .. مثل ماهو شرع للريايل ..
بعد شرع للحريم
وعسى الله يوفق سعيد بسعيده :)
يعطيج العافية :)
يمكن طبيعة مجتمعنا العربي الحالي جذي !! ولا تتوقعين انه هالشي حتى بالمجتمعات الثانية !!
شكرا لج
صدقتي يالغلا حلال عليهم وحرام علينا فية اشياء اعظم من الي سواه بوجاسم ..
1/ ليش الرجل ينسى العشره و اول ما تموت زوجته يدور لها بديل و بفترة قصيره؟؟
لان الرجل قلبه قوي الانثى من الصعوبه ان تنسى بسهوله وقلبها حنون ورهيف خصوصا لو كان زوج بينهم موده وحب ..
ليش بعض الحريم لما يموت زوجها ما تفكر الا بعيالها و شلون تربيهم و تقعد طول عمرها وفيه له ؟؟؟
هذي طبيعة الانثى التفاني في سبيل اسعاد من تحبهم ..
ليش المره الكبيره بالسن لما تذبحها الوحده و يلهون عنها عيالها بحياتهم و مشاغلهم لما تفكر مجردفكره بالزواج من شخص يعينها على باقي حياتها و تبوح للفكره لمن حولها تقوم الدنيا و لا تقعد ؟؟؟
للاسف هذي العادات والتقاليد وبالاخير ارد واقول مثل مابديت حلال عليهم حرام علينا ..
روعه طرحك بنتظار مزيدك..
ما ادري بس سؤال
اذا البنات طحيحة
من بياخذ الحجية؟
سؤال فقط بدون اعتراض على المبدأ
على فكرة
عندي تعليق يحك بس احتراماً لأم جاسم قررت الاحتفاظ فيه لنفسي :)
السلام عليكم ورحمة الله وبركاته
انا وجهة نظري ان ابو جاسم يمكن كبر بالعمر لاكن قلبه للحين شباب (قلبه خضر)
والزواج حق شرعي له وام جاسم الله يرحمها ويسكنها الجنه انشا الله
يمكن عيال ابو جاسم مشغولين ولاهين بحياتهم مو معقوله ابو جاسم بيكمل حياته وحيد لامن مرته ولا من عياله اهو محتاج من يحتويه عاطفياً بهذا العمر
وبالنسبه للحريم انا اخالفج الراي بالعكس في حريم وايد لما مات زوجها الاولي تزوجت وهذا حق شرعي لها والكثير الكثير ماتزوج لان الانثى مخلوق حساس تخاف ان اذا تزوجت يضيعون عيالها
وجهة نظر فقط
تحــياتي
والله انكم مجرمين تبون تتحكمون بالريال بحياتكم وبعد مماتكم وكله بحجة الوفاء
يا معودة خول الريال يتزوج يعني الا تطيحون عليه مع الخدامة ويطيح من عينكم علشان تستانسون؟
/ ليش الرجل ينسى العشره و اول ما تموت زوجته يدور لها بديل و بفترة قصيره ؟؟؟
موضروري ينسى العشرة ومافي وحدة مكان وحدة كون المجتمع ذكوري يتيح للرجل ان يتحكم بحياته بشكل شخصي اكثر من المراه
مثال
اذا الريال تزوج اهوه اللي يختار مطلقه ارملة عندها عيال ما عندها يعني الاختيار متاح اما المرأة فالوضع مختلف وموعيب ان يتزوج حتى لو زوجته ما كملت شهر كل انسان وحريته وايضا كل انسان يسخر مشاعره في خدمة قضيته يعني يوم بوجاسم قال ماتعودت عالوحده اهوه فعلا ما تعود عالوحدة وفي واحد ثاني ممكن ما يتزوج مو وفاء بقدر ماهو ان محد عارفله الا ام فلان وطبيعة البشر مختلفه بهالامر ويزاه الله خير زوجته كانت مريضة لا خذى عليها وغثها ولا اهملها وهذا بحد ذاته وفاء لها
/ ليش بعض الحريم لما يموت زوجها ما تفكر الا بعيالها و شلون تربيهم و تقعد طول عمرها وفيه له ؟؟؟
المرأة عاطفية اكثر وعاطفتها تجاه ابناءها تتفوق على حاجاتها الجنسية مقابل الرجل واللي الكل يعرف الحاجة الجنسية او بالاحرى التعود اللي يحس فيه تجاه المرأة ولكن المرأة وبطبيعتها تخاف
تخاف على عيالها ومستقبلهم اللي ترجع له من جديد في ان احنا مجتمع ذكوري وممكن يمنعها عن عيالها او يثقلون عليه او ....الخ
3/ ليش المره الكبيره بالسن لما تذبحها الوحده و يلهون عنها عيالها بحياتهم و مشاغلهم لما تفكر مجردفكره بالزواج من شخص يعينها على باقي حياتها و تبوح للفكره لمن حولها تقوم الدنيا و لا تقعد ؟؟؟
المجتمع ما تعود و
لأن ماعندها سالفه تقول لهم
روحي تزوجي وسحبي عالدنيا
طااااااااااف يبا
والله يا وخيتي عندي قاعده
او وحده تبي اتزوج خل اتزوج ومن اللي تبي بعد واللي عنده شي خل يبطل حلجة ...مارده حلجه بينترس تراب ويسكت
عابره
يا هلا و مرحبا ^_^
عابره تحليلج صح و كلامج مضبوط
و يا ليت اللي ينتقد هالحريم يقول
مثل قولج شرع الله و ما اوقف بطريجها
و الله يهني سعيد بسعيده :)
نورتيني بمرورج
و الحمدلله ع السلامه بعد هالانقطاع :))
the.thinker
هلا و مرحبا ^_^
اول شي الحمدلله على سلامتك اخوي
يعني نقول عادات و تقاليد مجتمعنا
العربي و حكمه الجائر
لا شرع و لا دين .
ناس غريبين احنا العرب ؟!!
و الله يعافيك نورت :)
ســأشـــرقـ
هلا و غلا بالاشراق ^_^
بعد قلبي و الله قلتي اللي في قلبي
عادات و تقاليد و حنان المره و
تفانيها اللي ممكن يخليها تنسى
روحها بزحام الحياه و حكم
الناس عليها .
و انتي معاي ع الخط طبعا ^_*
نورتي غلاتي
ولد الديرة
اهلييين و سهلييين ^_^
لووووووول
سؤالك عجيب كل حجيه و بنيه و
معاها رزقها بعدين الزين
كله عند الحجيات الله يمشي نصيبهم
اهم و البنيات :P
و الحمدلله انك مو معترض ع المبدا :)
الله يرحم ام جاسم و اموات المسلمين
نورت اخوي العزيز :)
تعاليل
و عليكم السلام و رحمة الله و بركاته
اهلين اخوي ^_^
وجهة نظرك بالنسبه لابوجاسم اي
صحيحه امبلى قلبه خضر الله يعطيه
الصحه و العافيه :))
امين يارب و موتى المسلمين
و المره صاج خوفها و اهتمامها
لعيالها .
نورت يا اخوي و لا تغيب وايد ^_^
فريج سعود
هلا فيك ^_^
ههههههههههه
شفيك علينا مجرمين كده مره وحده لوول
اي شخانة الانسان اذا ما صار وفي و
بعدين هذي ام عياله بيتزوج محد
قاضبه بس تعدي مده ع الاقل .
اما يطيحون عليه مع الخدامه اهنيه
يروحون في اعدام احسن يا زوجوني
يا اخورها @@
تخرعون يا الرياييل شياب او شباب
الله يعينا عليكم و يعينكم علينا :)
نورت اخوي
3ateeja
هلا و غلا ^_^
عتيجه ردج تبارك الرحمن الجمني
بس هما يراعي شعور اللي حوله و
تعدي مده مهما كان القلب شنوووو
مو حجر !!
(( المجتمع ما تعود و
لأن ماعندها سالفه تقول لهم
روحي تزوجي وسحبي عالدنيا
طااااااااااف يبا
والله يا وخيتي عندي قاعده
او وحده تبي اتزوج خل اتزوج ومن
اللي تبي بعد واللي عنده شي خل
يبطل حلجة ...
مارده حلجه بينترس تراب ويسكت ))
عتيجه ياكثر اللي تخاف و تطخ عقب هالحلوج اللي كلتها و تبطلت عليها
لا و بعضهم تفكر في هالحلوج قبل تتبطل
تسلمين و الله ع الرد الحلو مثلج
نورتي يا الغاليه
:(
ايـــــــــــه بوجاسم يا حليله مانطر اتخلص العده
والله مادري بس يختلف ريال عن ريال
زين ماتزوج عليها و اهي مريضه نطر عقب ماماتت زين احسن من غيره ولا حب يغثها
وبعدين مجتمعنا ذكوري يعني الريال اي شي يبيه يسويه مايحصل انتقادات من المجتمع نفس المرأه
ولا اتحرين نفسج حبيبتي هذا حال الدينا
:)
ههههه يحليله بوجاسم مامداه
بس ماالومه الريال محتاج حنان ومداراة بهالعمر لأنه آخر مطاف بالعمر
ومحد منع الحرمة اللي يموت زوجها ماتتزوج D:
بس الحرمة أحن من الريال على عيالها
وماتحب تسبب لهم عقدة أسمها زوج الأم
موضوع حلو وطرح عجيب
تسلمين عزيزتي
وبس
بابل
هذا شرع ومو حراااام بس العادات والتقاليد اذبحتنا كل شي عيب وفشله
انا بالنسبه لي عادي انه المره تتزوج بعد وفاة زوجها ,,,الوحده قاتله ولكن بشرط اذا كان هناك اولاد صغار ماتهملهم وتنساهم بوجود المعرس اليديد
واذا الابناء كبار احسن علشان تتفرغ للزوج اكثر ويمكن تكون حياتها معاه افضل من السابق
الله يعين الارمله والارمل ؟؟؟؟؟؟
الموضوع وااايد حلو وضربتي علي الوتر
لانه مجتمعنا يعاني من الامراض الاجتماعيه والعادات السيئه
اهم شي بو جاسم حلو؟؟؟؟؟؟؟؟؟؟؛)))
ينفع؟؟؟؟؟؟
عطيه ايميلي ؛)))))))
تحياتي يالشيخه,,,,
مو حرام ولا عيب
بس المرأه تآثر انها تربي عيالها
وتكبرهم وتشوف مستقبلهم وهذي غريزة الامومه فيها
Noor
هلا و غلا نور ^_^
و انتي الصاجه رياييل يا وخيتي :(
تسلمين بعد عمري ع المرور الحلو
نورتي
بابل
اهليين اخوي ^_^
حلت دنياك و اخرتك ان شاء الله
شفت شلون ما امداه :(
و هم انا ما الومه الوحده قاتله
بس يصبر امر الله من سعه .
و المره حنينه و كلها طيبه :))
الله يسلمك و يعافيك ع المرور الحلو
نورت
صبا
هلااااااا و غلاااااا
وين هالغيبه فقدناج ^_^
اي لا عيب و لا حرام قلتيها عادات
و تقاليد جايره شتقولين بعد .
امييين يا الغاليه الله يعينهم
و الاحلى من الموضوع طلتج حبيبتي :)
لوووووووووووووووول
بو جاسم حلو بالنسبه لعمره
الله يخليه لعياله ؛)
انتي تستاهلين اللي احلى منه
يا بنيه ^_*
اسعدني تواجدج صبويه
و لا تغطين وايد :)
Mamloo7a Q8ia
اهلييين بالمملوحه ^_^
صااجه المره تبيع عمرها عشان عيالها
تسلمين الغاليه ع المرور :)
نورتي
ناكر العشره...وشفت امثالهم كثير
والي يقولج اعرف واحد تزوج على مرته بعد شهر من وفاتها!!
لكن صدقيني في منهم الوفاء من طبعهم ومن بينهم جد وحده من البلوقريه تقول من يوم توفى و هو يبجي...هذا الحب والا بلاش
وعن المرهالعجوز الي تبي تتزوج...وليكون بعد تبي عرس!!
خخخخخخخخ اتخيل!! نفس جدة عوكل(الفلم المصري)
الاسلام ما حرمها لكن العادات امنعتها
ترى اعرف وحده عوده تزوجت بعد ما ريلها توفى لكن لحد الان الناس ينقدون عليها
وما اخفيج سر انا انقد على الي عمرها فوق 50 وتبي تتزوج
bu saad
هلا و غلا
وين قلبه هذا اللي تزوج عقب شهر :(
ياربي في مشاعر في احاسيس شيسون
فيها يدفنونها مثلا !!
هههههههههههههههههه
الله يقطع ابليسك جدة عوكل عاد
لا يبا اذا بتصير مثل جدة عوكل
ما نزوجها لوووووول
و بعدين ليش تنقد عليها امانه
تنقد ع الريال اللي بيتزوج
و عمره 50 ؟؟
جوابك اكيد لا << جاوبت عنك :P
نورتني يابو سعد ^_^
إرسال تعليق