............

بعد حفلة التخرج و الوناسة اللي استانستها

و الوعد اللي قطعته لكم اني اوثق لكم اللحظات

اقولكم انا اســـــــفـــــــــه :(

من كثر التدوده و العجله نسيت الكاميرا و موبايلي

بسيارتي و نزلت انا و رفيجتي ركض للباص

عشان يوصلنا لمكان الحفله :s

تبون الصج زين ما نسيت نفسي ما ادري ليش كنت

مرتبكه و يوم وصلت و قعدت على الكرسي قمت

اتفقد اغراضي و الا ناسيتهم قلت يلا اهلي معاهم

كاميراتهم و موبايلاتهم الحلوين نسوا الكاميرا بعد

و قعدت على الله و على مصور الجامعه و موبايلاتهم

اللي اسم الله عليهم ما خلو مقطع فيديو الا قرقتهم

و سوالفهم فيه و هم صورهم

لا و ازيدكم من الشعر بيت نسيت شهاااادتي ع المدرجات

لوووووووووول

بس الحمدلله انها شهاده شكليه من غير اسامي

و شهايدنا الاصليه استلمتها من شؤون الخريجين

عقب الحفله بيومين :P

لذلك اكرر اسفي يا اعزائي .

يوم عجيب بكل شي فيه ضحك و بجي و عبط و لعب

الحمدلله يارب و الفال للطلبه و الطالبات البلوقرزيه الحلوين

و الموظفين الفال لعيالكم و حبايبكم :))

حجية كويت كله منج خرعتيني من الحفله و نسيت شغلي :P

باجر يوم لا ينسى

مساء الورد

باجر الاثنين : 23 / 3 / 2009 حفلة تخرجي

من جامعة الكويت بعد سنه من التخرج راح نحتفل

بهاليوم مع زملائي و زميلاتي يوم بحياتي

ما راح انساه ..

طبعا الاسبوع اللي فات كان حوسه ازهب

لهلحفله اللي بتكون مره بالعمر

حدي فرحاااانه و حدي خايفه

ما ادري ليش يمكن لاني بستلم شهادتي

و بتكون تاكيد على انتهاء صلتي بالجامعه

و نهاية حياة جامعية مليئة بالذكريات ..

صج انا الحين متوظفه و صار لي سنه ما دشيت

الجامعه كطالبه بس كنت معطيه نفسي مهله

ليوم حفل التخرج عشان احس اني خلاااص

انهيت الجامعه لوووول

بإذن الله ما راح اوقف لهني بكمل ماستر و برجع

طالبه جامعه بس بمزاجي و فوق البيعه :P

يلا اشوفكم بعد حفلة التخرج و بقرق عنها

و بوثقها بالصور ان شاء الله :)

أمي يا كل الحنان

كل عام و امي و امهات العالم بخييييييييير و سعاده

في يوم الام ما ادري شقدم لاميمتي

احس كل شي شويه عليها و ما يوفيها حقها

ادري ان كل يوم بالسنه و كل لحظه بعمري

اهي يومج و عيدج بس هم يوم لكل امهات العالم

يوم تكريم لج و لهم ..

بقلبي كلاااااااااام و حب لج يا ست الحبايب

ما يوازيه مخلوق ...

تعبتي و سهرتي و درستي و خفتي علينا و كبرتي

و نسيتي كل شي لعيون عيالج بدوووووووون

مقابل فقط لكونج (( امــ )) ام حنونه تملك قلب من ذهب

ام مضحية ام تعطي و لا تاخذ ....

يما احبج و عمري ما يكفي لو اهديج

يما قدرج و ربي ما يقل او يثبت الا كل يوم يزيييييد

يما انتي عزي و مقداري يما يجنتي و ناري

يما انتي رفيجتي من كنت بمهادي

يما كل ما اتذكر تضحيتج بتكميل دراستج الجامعيه

عشاني احس نفسي ولاااااشي قدمت لج يساوي هالتضحيه

كان ممكن تدرسين و تراعيني كان ممكن تخليني

عند يداتي كان ممكن اشياء وايد ...

بس قلبج اللي حبني و فرح فيني و بخواني من عقبي

ما طاوعج تتركينا لو ثواني ...

لما كبرت قلت لج كملي و قمتي تضحكين

و تقولين عقب ما شاب ودوه الكتاب ...

شنووووو شاب و شنو الكتاب انتي اروع ام شابه

شافتها عيني و اللي اكبر منج يكملون ...

رديتي و قلتي انتي واخوانج شهااااااداتي

اللي طلعت فيهم من الدنيا و احلى مستوى دراسي

وصلت له و بوصله فيكم مو بلياكم .

تضحياتج واااااااااايد وااااااااااااايد وااااااااااااايد

شقول شخلي انتي ادرى بحبنا لج ..

يما سامحيني ادري انا اغثج مرات و اعاندج مرات

و زعلتج مرات بس و الله غصبن عني ..

ترا ما استانس بيوم لكنتي ثقلانه علي

لانج امي و حبيبتي و صديقتي و طبيبتي

و دنياي اللي تشكلت فيج و في الغالي ابوي

ياااااارب ما يحرمني منكم و لا يفرقكم يا اغلى ما بدنيتي

امممممم

لو بتكلم عنج انتي و ريلج اللي اهو ابوي العسل

ما راح اخلص بس دخلت ابوي معاج لان ماسوو

له يوم خاص اهو وباجي الابهات :(

بس ازعل وايد لو ما تدرون ان ايامنا كلها لكم و فيكم

اي صج تذكرين اغنية ((امنية )) حقت اصاله اللي احبهااااااااا

يننتج فيها بالسياره و كنتي تسكرينها و ارد اشغلها

و تسكرينها و ارد اشغلها تقولين ابي افهم منو اللي

لو تملكين حياتج تهدينها له لووووووووووول

ضحكت و قلتلج افااااا ما تدرين يعني منو

خزيتيني و قلتي تحجيييي

قلت اهم اثنين مو واحد @@

لفيتي علي و ودج تكفخيني منو اهم قووووووولي

قلت لج بالوقت المناسب راح اقولج حسيتج زعلتي

تالي يوم دخلنا البيت و شفتج انتي و ابوي قاعدين

قلت يمااااا :

الاثنين اللي اهديهم حياتي كاهم جدام عيني ..

واااي بس دمعت مابي اتحجى اكثر احبكم ربي يخليكم لي

و اغنية امنية و كلماتها الروعه ماكو احد يستاهلها بالدنيا الا انتوا

و الله اني ما اتمنى في حياتي الا شي ...

اني املك كل هالدنيا بيدي ...

ما اسمعك في يوم تنطق كان ودي ...

قبل لا تحلم احقق قبل لاتحكي اقول ...

قبل لا تشكي همومك لك اجي كلي حلول ...

و ليت كل هالكون بيدي لأجل احقق ما تبيه ...

أدري انه امنياتي هي مجرد امنيات ...

لو اني املكها حياتي كنت ابهديك الحياة ...

بس اشوف الابتسامة ما تفارق دنيتك ...

يلي كل ايامي تضحك لما المح بسمتك ...

إنت يا عزي و ذلي و اجمل اجمل ما حصلي وش اقدملك سواي ..

و ارمي ايامي تحت اطهر خطاااا ...

يلي كل ايام عمري قبل ما احبك خطااا ...

اي قهر و الله قهر اني ما اقدر حتي ما اقدر ..

اوصل حدود السما لاجل اهديلك قمر ...

ودي ودي و الله ودي بس مافي يديني شي ...

http://www.6rb.com/songs/4013.html

الله يحفظ كل الامهات و يحميهم ويطول بعمرهم على الطاعه

يارب لا تحرم ام من عيالها و لا عيال من امهم

يارب انك تشفي كل ام مريضه و تعافيها و تفرح قلوب عيالها

و جميع مرضى المسلمين يارب العالمين

يارب اعنا على طاعتهم و برهم دنيا و اخره

يارب انك تشافي والدة العزيزة (( زووز / عقر بقر ))

و تفرح قلبها بصحة اميمتها ياااارب

BaaaaacK

السلامووو عليكووو يا قماعة الخير

شخباركم و شعلومكم و شخبار فرجان

التدوين فريج فريج و بيت بيت

اشتقت لكم حييييييييييييل ، اووووووووووي ،

كتييييييييييييييييير ، واااااااااااااااايد

اختفيت بسبب ظروف مرت علي بس

الحمدلله و الشكر عدت على خير :)

كان عندي حجي و سوالف و مواقف ودي اكتبها

و اتحلطم عنها كافي ان كان بقلبي كلام ما قدرت

اطلعه حتى قلمي ما كان طايعني لو ارسم او اشخبط ...

ولكن فرررررررجت عسى الله يفرجها

على الجميع و يسعد الكل ..

عاد الحين حبيت اذكر الاحداث

الحلوه اللي طافتني و ما احتفلت فيهم بمدونتي :







**اولا :





العيد الوطني لامنا الكويت و ذكرى تحريرها .

كل عام و ديرة الخير بأمن و امان و شعبها الطيب .



عسى ينعاد عيدج يا كويت و انتي احلى





و اروع ديره بعيون عيالج .



و يحفظج من كل حاسد و طامع ..
















**ثانيا :






مدونتي الصغيرونه في 4 / 3 / 2009



و انا بعيده عنها طفت شمعتها الاولى :)

كنت ناويه اسوي لها بيق بارتي و اعزم حبايبي المدونين و المدونات


لكن نعمل ايه تقري الرياح بما لا تشتهي السفن :s



و لكني من هذ المنبر اوعدكم بحفله اخرى السنه القادمه


ان شاء الله و الله يعطيني و يعطيكم طولة العمر :P



<< ترا ما يحتاج احد يذكرني :))